Løgtingsins gerðabók fyri tingsetuna 2006

9. fundur

Ár 2006, týsdagin, 19. september, kl. 13.30, varð tingfundur settur.

Løgtingsmenninir Jógvan við Keldu, Høgni Hoydal, Hergeir Nielsen, Jenis av Rana og Johan Dahl, Jóannes Eidesgaard, løgmaður og Søren Christensen, ríkisumboðsmaður, vóru ikki á fundi

Farloyvi: 

Skriv frá John Johannessen, løgtingsmanni, dagfest tann 12. september 2006, við umsókn um farloyvi frá 18. september 2006 til 7. oktober 2006, og at næstvaldi á lista Javnaðarfloksins í Suðurstreymoyar valdømi tekur sæti á tingi.

Formaðurin heitti á Vilhelm Johannesen, Jørgen Niclasen og Heidi Petersen um at kanna, hvør næstvaldur er á lista Javnaðarfloksins í Suðurstreymoyar valdømi. Vilhelm Johannesen mælti til, vegna seg sjálvan, Jørgen Niclasen og Heidi Petersen, at Helena Dam á Neystabø tekur sæti á tingi fyri John Johannessen. Samtykt uttan atkvøðugreiðslu.

Skriv frá Gerhard Lognberg, løgtingsmanni, dagfest tann 19. september 2006, við umsókn um farloyvi frá 19. september 2006 og 10 dagar fram, og at næstvaldi á lista Javnaðarfloksins í Sandoyar valdømi tekur sæti á tingi. Samtykt uttan atkvøðugreiðslu, at Jákup Birgir Mohr, ið áður hevur verið á tingi, tekur sæti fyri Gerhard Lognberg.

Skriv frá Kára P. Højgaard, løgtingsmanni, dagfest tann 15. september 2006, við umsókn um farloyvi frá 19. september 2006 og 10 dagar fram, og at næstvaldi á lista Sjálvstýrisfloksins í Eysturoyar valdømi tekur sæti á tingi. Samtykt uttan atkvøðugreiðslu, at Dánial Petur Hansen, ið áður hevur verið á tingi, tekur sæti fyri Kára P. Højgaard.

Formaðurin bar fram minningarorð um Jonu Henriksen, fyrrverandi løgtingskvinnu, ið andaðist tann 4. september 2006, og tingmenn mintust hana í tøgn. 

Til viðgerðar:

1.    1. viðgerð av tingmáli nr. 4/2006: Uppskot til løgtingslóg um broyting í løgtingslóg um áseting og javning av almannaveitingum
Málið beint í trivnaðarnevndina.
 

2.    Framløga
Formaðurin boðaði frá, at Høgni Hoydal, løgtingsmaður, vegna Tjóðveldisflokkin hevur lagt fram tingmál nr. 11/2006: Uppskot til løgtingslóg um broyting í løgtingslóg um val til allar føroyskar kommunur, og at løgtings­menninir Finnur Helmsdal og Jenis av Rana hava lagt fram tingmál nr. 12/2006: Uppskot til samtyktar um eina null-loysn ætlan viðvíkjandi rúsevnum í Føroyum, og Edmund Joensen, løgtingsformaður, vegna formansskapin hevur lagt fram tingmál nr. 13/2006: Uppskot til samtyktar um at seta nevnd at endurskoða tingskipanina

Formaðurin fráboðaði hesar fyrispurningar:
Nr. 100-2/2006 til Hans Paula Strøm, landsstýrismann, frá Bill Justinussen, løgtingsmanni, viðvíkjandi Landssjúkrahúsinum, og
nr. 100-3/2006 til Bárð Nielsen, landsstýrismann, frá Finni Helsmsdal, løgtingsmanni, viðvíkjandi viðurskiftunum hjá tænastumonnunum á Sjóbjargingarstøðini.

Tikið av dagsskrá: 
Løgtingsmál nr. 8/2006: Uppskot til samtyktar um lívfrøðiligt margfeldi

Formaðurin setti næsta fund at verða mikudagin, 20. september 2006, kl. 13.30  við hesi dagsskrá:

1.    Munnligir fyrispurningar

2.    Atkvøðugreiðsla um fyrispurning nr. 100-2/2006 til Hans Paula Strøm, landsstýrismann, frá Bill Justinussen, løgtingsmanni, viðvíkjandi Landssjúkrahúsinum

3.    Atkvøðugreiðsla um fyrispurning nr. 100-3/2006 til Bárð Nielsen, landsstýrismann, frá Finni Helmsdal, løgtingsmanni, viðvíkjandi viðurskiftunum hjá tænastumonnunum á Sjóbjargingarstøðini.

4.    Framløga

Fundur lokin kl. 17.10 

Edmund Joensen

løgtingsformaður 

/Beinta Isaksen
skrivari