Løgtingið var millum teir fyrstu almennu myndugleikarnar í Føroyum, sum stovnsetti sína egnu heimasíðu á internetinum, www.logting.fo. Hon fór at virka á ólavsøku 1998 og hevur síðan stovnsetingina ment seg og er nú helst ein av mest víðfevndu almennu heimasíðunum í Føroyum.

Á heimasíðuni finst dagsskráin fyri tingfundir, og til ber at lurta eftir orðaskiftinum beinleiðis á internetinum.  Orðaskiftini, sum verið hava, verða eisini goymd soleiðis, at seinni kann farast á internetið at lurta. Gerðabøkur tingsins liggja  somuleiðis á internetinum.

Uppskotini, álit í málunum, møgulig broytingaruppskot og yvirlit yvir, hvussu hvør einstakur tingmaður hevur atkvøtt, eru tøk á heimasíðuni so skjótt, sum tey eru framløgd.

Virksemið hjá nevndunum verður lýst á heimasíðuni. Dagsskráir og gerðabøkur hjá nevndunum eru tøkar, og øll skjøl, sum nevndarlimirnir fáa handað, verða løgd alment út á heimasíðuni.

Upplýsingar eru um lívsleiðirnar hjá tingmonnum, og hvørjir tingmenn manna tingnevndirnar.

Gomul tingmál finnast á heimasíðuni. Løgtingstíðindi frá 1880 til 2002 eru avprentað og løgd á heimasíðuni. Hetta er rúgvusmikið tilfar, yvir 70.000 blaðsíður. Leitiskipan er gjørd at leita í tingtíðindum aftur til 1936. Leitast kann eftir uppskotssetara, evni og hvør ríkis- ella løgtingslóg kom burturúr.