Privatar skráir

24 Uppskot til løgtingslóg um broyting í løgtingslóg um privatar skráir

A. Upprunauppskot
B. 1. viðgerð
C. Álit
D. 2. viðgerð
E. 3. viðgerð

Ár 1998, 4. november legði Høgni Hoydal, landsstýrismaður, vegna landsstýrið fram soljóðandi

Uppskot

til

løgtingslóg um broyting í løgtingslóg um privatar skráir

§ 1.

Í løgtingslóg nr. 107 frá 15. november 1985 um privatar skráir við seinri broyting, verða gjørdar hesar broytingar:

1) Í § 2, stk. 2 verða orðini: "til vísindaligt ella hagfrøðiligt endamál ella" strikað.

2) Í § 2 verður sett sum stk. 3:

"Stk. 3. Lógin fevnir ikki um skráseting, ið einans verður gjørd við vísindaligum ella hagfrøðiligum endamáli. Skráseting við hesum endamálum av upplýsingum, sum nevndar eru í § 3, stk. 2, kann tó einans fara fram eftir fráboðan frammanundan til skrásetingareftirlitið. Skrásetingareftirlitið kann áseta nærri treytir fyri skránna fyri at verja privatlívið hjá teimum skrásettu, heruppií um samtykki frá skrásetta, um striking og dagføring av upplýsingum og um trygdarfyriskipanir móti, at skráin verður misnýtt ella kemur til kunnleika hjá óviðkomandi."

§ 2.

Henda lóg kemur í gildi dagin eftir, at hon er kunngjørd. Samstundis verður danski teksturin í lógini við seinni broytingum strikaður.

Viðmerkingar

Skrásetingareftirlitið hevur heitt á landsstýrið um at broyta lógina um privatar skráir, soleiðis at Skrásetingareftirlitið kann seta treytir til skráir til vísindaligt ella hagfrøðiligt endmál.

Henda regla stendur í donsku skrásetingarlógini, og upplýsir skrásetingareftirlitið, at tað í seinastuni hevur havt nøkur dømir uppá privatar edv-skráir til granskingarendamál, ið hava innihildið sera viðkvæmar upplýsingar um fólk. Mett verður, at tað er eitt hol í lógini, at eftirlitið ikki hevur kunna sett treytir til slíkar skráir.

Mett verður, at broytingin ikki fær fíggjarligar avleiðingar fyri landskassan.

Málið hevur verið lagt fram í vár, men fall burtur, tá løgtingsval varð útskrivað.

Viðmerkingar til tær einstøku broytingarnar.

Ad 1) Orðini "til vísindaligt ella hagfrøðiligt endamál ella" standa ikki longur í § 2, stk. 2, har annars er ásett, hvat lógini ikki er galdandi fyri.

Ad 2) Skrásetingar til vísindaligt og hagfrøðiligt endamál eru nú viðgjørdar í stk. 3, og sum høvuðsregla koma slíkar skrásetingar ikki undir lógina, men verður nú sett tann treyt, at Skrásetingareftirlitið skal hava fráboðan frammanundan, og kann eftirlitið seta treytir til skránna fyri at verja privatlívið hjá teimum skrásettu.

Mælt verður løgtinginum til at samtykkja uppskotið til broyting í løgtingslógini um privatar skráir.

1. viðgerð 6. november 1998. Málið beint í rættarnevndina, sum tann 20. november 1998 legði fram soljóðandi

Á l i t

Málið er lagt fram av landsstýrinum tann 4. november 1998 og eftir 1. viðgerð tann 6. november 1998 beint í rættarnevndina.

Eftir uppskotinum verða skrásetingar til vísindaligt ella hagfrøðiligt endamál ikki longur undantiknar skrásetingarlógini, men serreglur kunnu verða settar inn fyri, hvussu mál um slíkar skráir verða at handfara.

Rættarnevndin hevur viðgjørt málið á fundi 13. november 1998.

Undir viðgerðini hevur nevndin havt fund við formannin í skrásetingareftirlitinum.

Ein samd nevnd mælir løgtinginum til at samtykkja uppskotið.

2. viðgerð 26. november 1998. §§ 1 og 2 samtyktar 21-0-0. At málið soleiðis samtykt kann fara til 3. viðgerð samtykt uttan atkvøðugreiðslu.

3. viðgerð 1. december 1998. Uppskotið, sum samtykt við 2. viðgerð, endaliga samtykt 29-0-0. Málið avgreitt.

J. nr. 650-1/94
Ll. nr. 82/1998