Eykajáttan

1-9  Uppskot til  eykajáttanarløgtingslóg fyri mars 1999

Hetta er onnur eykajáttanarløgtingslóg, sum verður løgd fyri tingið av landsstýrinum. Samlaðu útreiðslurnar hækka við uml. 30 mió.kr., harav 25 mió.kr. er studningur til Veðhaldsgrunnin.

1.10.2.01. Innanvirkis grannskoðan (Rakstrarjáttan)

Seinasta tíðina hevur Fíggjarmálastýrið viðgjørt spurningin, hvussu fíggjarmálaøkið skal grannskoðast. Hesir møguleikarnir eru umrøddir:

• Skipað verður ein innanhýsisgrannskoðan fyri alt fíggjarmálaøkið
• Grannskoðanin av fíggjarmálaøkinum verður útinnt av Grannskoðanardeild Landskassans.

Ført hevur verið fram, at um ein innanhýsisgrannskoðan skal fáast at virka nøktandi verður neyðugt við minst trimum fólkum.

Ein fyrimunur, ið nevndur hevur verið við innanhýsis grannskoðan, er, at leiðslan í Fíggjarmálastýrinum kann brúka eina tílíka deild í sínum eftirlitsarbeiði.

Vansin við at skipa innanhýsisgrannskoðanir í teimum ymisku stýrunum er, at talan verður um smáar eindir, ið sostatt eisini verða sárbarar, um starvsfólk fara úr starvi ella fara í farloyvi. Eisini verður trupult at fáa bygt upp nakað veruligt grannskoðaraumhvørvi.

Fíggjarmálastýrið metir, at verður grannskoðanin savnað hjá Grannskoðanardeild Landskassans, er møguleiki fyri at byggja upp eitt munadygt grannskoðaraumhvørvi, samstundis sum talan verður um eina bíligari loysn fyri samfelagið.

Grundað á omanfyristandandi eru Fíggjarmálastýrið og Grannskoðanardeild Landkassans komin ásamt um:

2.11.2.06. Studningur til kommunala láni- og veðhaldsgrunnin

Í sambandi við, at landsstýrið arbeiðir við eini loysn á kommunuskuldini, verður við hesum søkt um eina eykajáttan uppá 25 mió.kr. sum studningur til kommunala láni- og veðhaldsgrunnin.

Landsstýrið hevur saman við kommununum í eina tíð arbeitt við at finna eina loysn fyri tær mest skuldarbundnu kommunurnar. Í hesum sambandi er ætlanin at nýta pening úr kommunala láni- og veðhaldsgrunninum.

5 ára lániavtalan, sum er gjørd ímillum kommunurnar og teirra lánveitarar, hevur sum eina treyt, at grunnurin hevur eitt innskot uppá 100 mió.kr. fram til 01.12.2000, tá avtalan fer úr gildi.

Landsstýrið og umboð fyri kommunurnar eru samd um, at skuldarbyrðan hjá eini kommunu eigur ikki at vera hægri enn 3 álíkningar við 23% í kommunuskattaprosenti, um hon skal kunna klára sínar uppgávur og skyldur. Fyri at náa hesum setningi, skulu 65 mió.kr. avskrivast hjá 5 kommunum.

Harafturat eru nakrar kommunur, sum liggja líka undir 3 álíkningar, og sum hava eina slíka samanseting av sínum lánum, at neyðugt verður at taka hesar við í eini loysn, soleiðis at eisini hesar kunnu fáa fíggjarligt fótafesti aftur.

Fyri at fremja hesa ætlan, verður neyðugt at tilføra grunninum 25 mió.kr., fyri at hann kann lúka treytirnar í lániavtaluni um, at hann skal hava 100 mió.kr. í innskoti.

Peningurin, sum grunnurin hevur lagt út til ávísar kommunur, verður avskrivaður í grunninum tá lániavtalan gongur út 01.12.2000.

Í góðari tíð er ætlanin at fáa avklárað, um grunnurin skal halda áfram eftir 01.12.2000, og verður tað upp til ta einstøku kommununa, um hon vil verða við í eini felags fígging ella ikki.

Tær kommunur, sum ikki ynskja at verða við í eini felags fígging eftir 01.12.2000, fáa útgoldið helvtina av tí niðurskrivaða partinum av grunninum, sum tær eiga, og hina helvtina 01.12.2005. Útgjaldið skal nýtast at niðurgjalda lán oman fyri eina álíkning.

Tær kommunur, sum ynskja at verða við í eini felags fígging koma at hava láni- og veðhaldsgrunnin sum trygd fyri sínum lánum, og fáa harvið lægri rentu enn annars.

Í láni- og veðhaldsgrunninum verður tískil peningurin hjá teimum kommunum, sum luttaka í felags fíggingini, og helvtin av peninginum hjá hinum kommununum, sum ikki skal útgjaldast fyrr enn 01.12.2005.

Landsstýrið er sinnað at viðvirka til at fáa eina felags endurfígging av kommunalu skuldini, sum skal avloysa núverandi avtalu, sum gongur út 01.12.2000.

Sundurgreinað ætlan

3.15.1.04. Toll- og skattastova Føroya (Rakstrarjáttan)

8.11.1.08. Almanna- og heilsumálastýrið (Rakstrarjáttan)

Innan Almanna- og heilsumálastýrið finnast 5 ymiskar lønarskipanir, ið ikki klára ár 2000 trupulleikan, bæði hvat viðvíkir hard-og software, og tískil ikki kunnu útgjalda løn eftir aldarskiftið. Tað eru uml. 2500 persónar í almanna- og heilsuverkinum, ið fáa løn útgoldna gjøgnum hesar skipanir eftir uml. 25 sáttmálum.

Føroya Gjaldstova er í sambandi við ár 2000 trupuleikan farin undir eina lønarverkætlan við tí endamáli, at allar almennar lønir skulu útgjaldast gjøgnum eina sentrala lønarskipan, ið Føroya Gjaldstova skal umsita. Føroya Gjaldstova hevur havt ætlanir um, at henda nýggja skipan skuldi takast í nýtslu við endan av ár 1999, men verkætlanin verður fyrst liðug ultimo ár 2000.

Tann desentrali parturin, t.v.s. tímauppsparing- og vaktarskipanir, skal Almanna- og heilsumálastýrið sjálvt standa fyri gerð av og umsita. Skipanirnar innan almanna- og heilsuverkið eru rættiliga kompliseraðar, tí bróðurparturin av teimum, ið fáa løn, arbeiða í skiftandi vaktum. Lønarskipanin umfatar tí umframt lønarútrokning og lønarútgjalding eisini skipanir til vaktarskráseting, tímarapportering og budgeteftirlit.

Almanna- og heilsumálastýrið hevur kannað møguleikarnar fyri at loysa ár 2000 trupuleikan við verandi skipanum, og ein føroysk fyritøka er biðin um at geva tilboð uppá hetta arbeiðið. Harafturat skulu tær 4 gomlu lønarmaskinurnar skiftast út við eina felags lønarmaskinu, ið verður leigað. Ætlanin er, at partar av almannaumsitingini eisini skulu koyra á somu maskinu. Brúk verður fyri 1 mió. kr. afturat til trygging av ár 2000 trupuleikanum.

Ár 2000 tryggingin av teimum gomlu skipanunum er ein fyribils loysn. Neyðugt verður tí beinanvegin at fara undir at útvega eina nýggja, tíðarhóskandi desentrala skipan til Almanna- og heilsumálastýrið, ið samstundis er eitt fíggjarstýringaramboð hjá stovnunum viðvíkjandi nýtslu av lønarkrónum og tímauppsparing. Almanna- og heilsumálastýrið hevur kannað eina slíka skipan, og verkætlanin kemur at kosta uml. 6 mió kr yvir 2 ár.

Sostatt verður brúk fyri 4 mió kr. í alt eyka í ár til ár 2000 trupulleikan og nýggja lønarskipan.  

Sundurgreinað ætlan

8.21.1.07. Hjálpartólamiðstøðin (Rakstrarjáttan)

Hjálpartólamiðstøðin eigur tveir bilar, har tann eini frá 1988 er uppslitin og rustaður. Neyðugt er at útvega Hjálpartólamiðstøðini eykajáttan til keyp av einum nýggjum bili á 220 t.kr.

Sundurgreinað ætlan

8.21.6.02. Bústovnur, serforsorg

Í samband við at játtanin í 1998 skuldi nýtast til stovnsfæ til sjálvsognarstovnin "Sambýlir", bleiv henda høvuðskonto í eykajáttanarløgtingslógin fyri desember 1998 broytt frá at vera "løgujáttan", til at vera "onnur játtan".

Av tí at endaliga fíggjarlógin fyri 1999 varð avgreidd, áðrenn eykajáttanaruppskotið fyri desember 1998 varð samtykt. stendur í fíggjarlógini fyri 1999, at henda høvuðskonto er "løgujáttan" við einari játtan uppá 4 mió. kr. Tí er neyðugt at upprætta nýtt høvuðskonto nr. til játtanina í 1999 (sí høvuðkonto 8.21.6.05).

Fluttar verða 1. mió. kr. frá 8.21.6.05. til hesa høvuðskonto, sum skal setast í sjálvsognarstovnin "Sambýlir". Sjálvsognarstovnurin hevur til endamáls at keypa hús til serforsorgarøkið. Játtanin skal nýtast til stovnsfæ, og verður upphæddin ein partur av fíggingini til tey hús, sum ætlanin er at keypa.

Sundurgreinað ætlan

8.21.6.05. Bústovnur, serforsorg (Løgujáttan)

Hetta er nýggja høvuðskonto nr. til løgujáttanina í 1999.

1. mió. kr. verður flutt til høvuðskonto 8.21.6.02. "Bústovnur, serforsorg (onnur játtan), sum skulu setast í sjálvsognarstovnin "Sambýlir". Ætlanin er at nýta restjáttanina til bygging av einum nýggjum landsstovni í norðoyggjum.

Sundurgreinað ætlan

8.21.9.01. Dagstovnar

Fyri at nøkta bráfeingis tørvinum á barnaansingarøkinum er brúk fyri eini eykajáttan á kr. 500.000 til rakstrarstað 8.21.9. "Dagstovnar". Eykajáttanin, sum verður latin til nýtt virksemi í 1999, er treytað av, at ikki meir peningur frá landskassanum verður settur av til økið í fíggjarárinum 1999. Landsstýrismaðurin í almannamálum vil tó ikki forða kommunum sjálvum at fíggja nýtt virksemi í 1999, tí lógarheimild er til hetta í verandi almannalógum. Í sambandi við skipan av barnaansingarøkinum í framtíðini hevur Almanna- og heilsumálastýrið sett ein arbeiðsbólk at arbeiða við uppskoti at broyta uppgávu-, ábyrgdar- og fíggjarbýtið millum land og kommunu at seta í gildi fyri næsta fíggjarár.

Sundurgreinað ætlan