13 Uppskot til løgtingslóg um broyting í løgtingslóg um ættleiðingarstuðul
A. Upprunauppskot
B. 1. viðgerð (Orðaskifti riggar ikki)
Ár 2008, 9. september, legði Annka Olsen, løgtingskvinna, vegna Fólkaflokkin fram soljóðandi
§ 1.
Í løgtingslóg nr. 51 frá 3. mai 1994 um ættleiðingarstuðul, sum seinast broytt við løgtingslóg nr. 125 frá 22. desember 2000, verður gjørd henda broyting:
Í § 1, stk. 1 verður “50.000” broytt til: “75.000”.
§ 2.
Henda løgtingslóg kemur í gildi dagin eftir, at hon er kunngjørd.
Viðmerkingar
Endamálið við uppskotinum er at betra um fortreytirnar fyri ættleiðing av
útlendskum børnum við at hækka ættleiðingarstuðulin úr kr. 50.000 upp í kr.
75.000.
Krøvini fyri at ættleiða gerast strangari, og prísirnir eru øktir munandi hesi seinastu árini, í miðal einar 30-40.000 krónur fyri hvørja ættleiðing. Í dag hevur ein ættleiðing millum 130.000-140.000 kr. við sær í útreiðslum. Hetta ger tað truplari fyri hjún at ættleiða, og fyri láglønt og miðallønt er hetta næstan ómøguligt. Almenni stuðulin til ættleiðing er í løtuni 50.000, og ger hetta, at mong, ið ætla sær at ættleiða børn, mugu setast aftur, tí tað als ikki ber til fíggjarliga. Havast skal eisini í huga, at oljuprísir, matvøruprísir, bústaðir, rentan v.m. eisini eru hækkað tey seinastu árini, hetta tyngir somuleiðis um gerandisdagin hjá føroysku familjuni.
Ættleiðingarfelagið hevur víst á, at best hevði verið, um stuðulin varð hækkaður upp í 100.000, og Løgtingið eigur at kanna, um rúm er fyri tí á fíggjarlógini fyri 2009. Tað er ein týdningarmikil samfelagsuppgáva at betra um korini hjá teimum, ið vilja ættleiða børn, tí børnini eru virðismiklasta tilfeingið, eitt samfelag eigur. Barnsburðartalið stendur mest sum í stað í Føroyum. Sambært Hagstovu Føroya vórðu 712 børn fødd í 2005, 662 í 2006 og 672 børn vórðu fødd í 2007. Um vit kunnu betra um karmarnar fyri ættleiðing, er tað eitt stig tann rætta vegin fyri at hækka barnatalið í Føroyum. Sambært ársfrágreiðingini hjá Ríkisumboðnum 2008 vórðu 10 útlendsk børn ættleidd til Føroya í 2007.
Fíggjarligar avleiðingar
Játtanin á fíggjarlógini til ættleiðing var fyri 2007 kr. 850.000, men bara kr. 550.000 vórðu nýttar. Í 2008 eru somuleiðis kr. 850.000 játtaðar á fíggjarlógini, og tískil er rúm fyri at hækka stuðulin úr kr. 50.000 upp í kr. 75.000 fyri barnið, soleiðis sum uppskotið mælir til. Hækkingin er harvið útreiðsluneutral, um talið av ættleiðingarloyvum verður tað sama sum í 2007.
Á tingfundi 30. september 2008 boðaði formaðurin frá, at málið er tikið aftur av uppskotsstillaranum. Upp á fyrispurning frá formanninum, sambært § 55, tóku Bergtóra Høgnadóttir Joensen og Kári á Rógvi uppskotið upp aftur.
1. viðgerð 1. oktober 2008. Málið beint í Trivnaðarnevndina.
Á tingfundi 18. desember 2008 boðaði formaðurin frá, at málið er tikið aftur av uppskotsstillaranum. Upp á fyrispurning frá formanninum, sambært § 55, tók eingin málið upp aftur. Málið avgreitt.