051.06 Barnastuðul

Ár 2006, 18. desember, legði Bárður Nielsen, landsstýrismaður, vegna landsstýrið fram soljóðandi

§ 1. Persónur, ið hevur foreldramyndugleika yvir barni, hevur eftir ásetingunum í hesi løgtingslóg rætt til barnastuðul, um viðkomandi hevur fulla skattskyldu og fast tilhald í Føroyum.

Stk.2. Foreldur, ið hava felags foreldramyndugleika, gera sjálvi av, hvør teirra skal hava stuðulin. Um bæði foreldrini biðja um stuðulin, verður stuðulin latin tí persóni, sum hevur barnið búgvandi hjá sær.

§ 2. Býr barnið ikki hjá einum persóni, sum hevur foreldramyndugleika yvir barninum, kann barnastuðulin í staðin latast tí persóni, sum hevur barnið búgvandi hjá sær.

§ 3. Barnastuðul verður latin, til barnið er 18 ár.

Stk. 2. Barnastuðulin verður útroknaður seinast í hvørjum mánaði og útgoldin antin seinast í hvørjum mánaði ella fyri fýra mánaðir í senn, seinast í mars, juli og november.
Stk. 3. Barnastuðulin verður fluttur á kontu í peningastovni og giro.

§ 4. Hevur barnaverndarnevnd yvirtikið umsorganina fyri barninum, verður barnastuðul ikki latin.

§ 5. Landsstýrismaðurin í fíggjarmálum kann í kunngerð áseta nærri reglur um útgjalding av barnastuðli, sbr. §§ 2 og 3, og um fráboðanarskyldu, sbr. § 4.

§ 6. Toll- og Skattstova Føroya rindar barnastuðulin, sum lutvíst verður fíggjaður av landinum og lutvíst av kommununum.

Stk. 2. Landið rindar árliga kr. 6.000 í barnastuðli fyri hvørt barn, meðan kommunurnar hvør sær í seinasta lagi 1. desember áseta ta upphædd, sum skal latast í barnastuðli árið eftir.

Stk.3. Útreiðslurnar til barnastuðul hevur tann kommuna, har viðkomandi, ið hevur rætt til stuðul, er tilmeldaður, tá stuðulin verður útroknaður.
Stk. 4. Kommununnar partur av barnastuðlinum verður mótroknaður í teirri skattaupphædd, sum verður útgoldin kommununi hvønn mánað. Mótrokningin verður gjørd í útgjaldinum í tí mánað, sum kemur beint aftaná mánaðin, tá barnastuðulin er útgoldin.

§ 7. Avgerðir, tiknar eftir hesi løgtingslóg, kunnu innan 4 vikur kærast til kommunalu skattakærunevndina. Kæran skal vera skrivlig, og grundgeving fyri kæruni skal vera við.
Stk. 2. Avgerðin hjá kommunalu skattakærunevndini kann innan 4 vikur kærast til Skatta- og Avgjaldskærunevndina.
Stk. 3. Freistin í stk. 1 og 2 verður roknað frá tí degi, tá kærarin fekk boð um avgerðina.

§ 8. Renta verður roknað av ov nógv útgoldnum barnastuðli við 0,7% fyri hvønn byrjaðan mánað frá útgjaldingardegnum at rokna. Sama er galdandi fyri skuldskrivaða rentu.

Stk. 2. Ov nógv útgoldin barnastuðul við afturatkomnum eykagjøldum, rentum v.m. verður eftirhildin í A-inntøku skuldarans eftir reglunum í skattalógini, eins og panting kann fremjast eftir reglunum fyri innkrevjing av skattum og avgjøldum.

§ 9. Henda løgtingslóg kemur í gildi dagin eftir, at hon er kunngjørd, og hevur virknað frá 1. januar 2007.

Kapittul 1. Almennar viðmerkingar
Landsstýrismaðurin í fíggjarmálum leggur við hesum fram uppskot til løgtingslóg um barnastuðul.

Í sambandi við at gera skattalógina einfaldari vórðu viðfevndar broytingar framdar í 1997. Flest allir frádráttir vórðu tiknir út úr skattaskipanini tá, men barnafrádrátturin varð tó ikki avtikin. Við hesum uppskotinum verður mælt til, at barnastuðulin verður umlagdur til eina útgjaldskipan. Hetta er eisini við til at betra um gjøgnumskygni á fíggjarlógini, við tað at hetta kemur at framganga sum ein játtan á fíggjarlógini.

Eisini er hetta ein liður í familjupolitisku ætlanunum hjá landsstýrinum um at betra um korini hjá barnafamiljunum, við tað at barnastuðulin hækkar.

Uppskotið hevur verið til hoyringar hjá kommunufeløgunum, Almanna- og Heilsumálaráðnum, Høvuðsbarnaverndini og Almannastovuni.

Kommunufeløgini høvdu ikki stórvegis viðmerkingar til uppskotið, men vístu tó á, at skotbráið at gera viðmerkingar hevði verið ov stutt.

Almanna- og Heilsumálaráðið og Almannastovan mæltu til ymiskar broytingar við atliti at almannalóggávuni. Hesi tilmæli eru ikki innarbeidd í lógaruppskotið, tí mett verður, at tað er rættari, at nevndu broytingar verða framdar í almannalóggávuni.

Tær fíggjarligu avleiðingarnar av lógaruppskotinum verða mettar at verða kr. 450.000,-. Útreiðslurnar fara til at menna KT-skipanina og tillaga umsitingina við atliti til broytingarnar.

Eftir uppskotinum verður stuðul veittur fyri 18 ár – í mun til 19 ár eftir galdandi reglum. Upphæddin, ið verður útgoldin, hækkar tí við kr. 500,- pr. ár.

Uppskotið hevur harnæst fíggjarligar avleiðingar fyri ávísar samfelagsbólkar, sum við verandi skipan ongan barnafrádrátt fáa, tí útroknaði skattur teirra undir øllum umstøðum hevði verið lækkaður eftir § 64 í skattalógini.

Mett verður ikki, at lógaruppskotið hevur við sær stórvegis fyrisitingarligar avleiðingar fyri landið og kommunurnar.

Mett verður ikki, at lógaruppskotið hevur avleiðingar við sær fyri umhvørvið ella í mun til altjóða avtalur og reglur.

Í mun til galdandi skipan er við uppskotinum møguleiki fyri mánaðarligum stuðli, og má hetta metast sum ein sosialur fyrimunur fyri uppihaldarar, ið ikki hava skattskylduga inntøku, eitt nú lesandi. – Eftir galdandi skipan høvdu hesi ikki fingið útgjald, fyrr enn avlopsskattur varð útgoldin árið eftir.

Stuðulin er sum útgangsstøði treytaður av, at stuðulsmóttakarin hevur foreldramyndugleika yvir barninum, jbr. tó § 2. Harumframt er stuðulin treytaður av, at stuðulsmóttakarin hevur fulla skattskyldu og fast tilhald í Føroyum. Við fast tilhald er at skilja bústað í Føroyum.

Við foreldramyndugleika er at skilja ásettur ella avtalaður foreldramyndugleiki, herundir felags foreldramyndugleiki.

Spurningurin um fulla skattskyldu verður avgjørdur eftir § 1, nr. 1-5 í skattalógini, meðan spurningurin um heimstað verður grundaður á skrásetingina í fólkayvirlitinum.

Hava foreldrini felags foreldramyndugleika, men bert annað av foreldrunum hevur heimstað í Føroyum, er tað ikki ein treyt fyri at fáa barnastuðul, at viðkomandi hevur barnið búgvandi hjá sær.

Býr barnið ikki hjá einum persóni, sum hevur foreldramyndugleika yvir barninum, kann barnastuðulin í staðin latast tí persóni, sum hevur barnið búgvandi hjá sær.

Eftir ásetingini kann stuðul t.d. verða veittur einari ommu ella einum abba, sum hevur barnið búgvandi hjá sær, men sum nevnt í § 4 verður stuðul ikki latin, um barnaverndarnevnd hevur yvirtikið umsorganina fyri barninum.

Barnastuðul verður útroknaður til og við mánaðin, barnið verður 18 ár.

Í sambandi við føðing og tilflyting byrjar stuðulsskeiðið mánaðin eftir, at barnið verður føtt ella flytur til landið. Í sambandi við deyða og fráflyting verður stuðul útroknaður til og við mánaðin, barnið doyr ella flytur av landinum.

Barnastuðul verður ikki veittur, tá tað almenna hevur átikið sær umsorganarskylduna fyri og harvið útreiðslurnar av barninum til eitt nú samsýning til fosturforeldur.

Landsstýrismaðurin kann í kunngerð áseta nærri reglur um, hvørji krøv skulu setast til skjalprógv v.m., tá barnastuðulin skal latast persóni, sum ikki hevur foreldramyndugleika yvir barninum, men kortini hevur barnið búgvandi hjá sær. Somuleiðis verður mælt til, at landsstýrismaðurin í kunngerð fær heimild til at fyriskriva nærri, hvussu tað skal fráboðast Toll- og Skattstovu Føroya, at barnaverndarnevnd hevur yvirtikið umsorganina fyri barninum.

Barnastuðulin verður lutvíst rindaður av landinum og lutvíst av kommununum.

Í mun til galdandi reglur um barnafrádrátt verður barnastuðulin rættvísari fyri kommunurnar. Eftir galdandi reglum verður skift kvartárliga í sambandi við flyting úr einari kommunu í aðra, meðan eftir uppskotinum verður skift mánaðarliga.

Barnastuðulskærur verða viðgjørdar eins og skattakærur eftir reglunum í løgtingslóg um Toll- og Skattafyrisiting.

Renta verður roknað av ov nógv útgoldnum barnastuðli við 0,7% fyri hvønn byrjaðan mánað frá útgjaldingardegnum at rokna. Sama er galdandi fyri skuldskrivaða rentu.

Toll- og Skattstova Føroya kann eftirhalda ov nógv útgoldnan barnastuðul við afturatkomnum eykagjøldum, rentum v.m. í A-inntøku skuldarans eftir reglunum í § 136 í løgtingslóg um landsskatt og kommunuskatt, eins og panting kann fremjast fyri ov nógv útgoldnan barnastuðul eftir reglunum fyri innkrevjing av skattum og avgjøldum

Lógin fær virknað tann 1. januar 2007, og galdandi reglur um barnafrádrátt verða samstundis settar úr gildi.

1. viðgerð 20. desember 2006. Løgtingsmálini nr. 50 og 51/2006 vórðu viðgjørd undir einum og beind í fíggjarnevndina

Á tingfundi 20. apríl 2007 las formaðurin skriv frá Bárði Nielsen, landsstýrismanni, har sagt varð frá, at hann tekur málið aftur.

	Fyri landið/lands- myndugleikar	Fyri kommunalar myndugleikar	Fyri pláss/øki í landinum	Fyri ávísar samfelagsbólkar/ felagsskapir	Fyri vinnuna
Fíggjarligar/ búskaparligar avleiðingar	Ja	Nei	Nei	Ja	Nei
Umsitingarligar avleiðingar	Nei	Nei	Nei	Nei	Nei
Umhvørvisligar avleiðingar	Nei	Nei	Nei	Nei	Nei
Avleiðingar í mun til altjóða avtalur og reglur	Nei	Nei	Nei	Nei	Nei
Sosialar avleiðingar				Ja