A. Upprunauppskot
B. 1. viðgerð (Orðaskifti riggar ikki)
C. Nevndarskjøl
D. Álit
E. 2. viðgerð
F. Orðaskifti við 2. viðgerð
G. 3. viðgerð
H. Orðaskifti við 3. viðgerð

Ár 2005, 8. november, legði Bárður Nielsen, landsstýrismaður, vegna landsstýrið fram soljóðandi

Uppskot

til

Kapittul 1. Almennar viðmerkingar

Landsstýrismaðurin við fíggjarmálum leggur við hesum lógaruppskoti fram uppskot um broytingar til árliga vektgjaldið á bilum, bussum, vøru- og lastvognum o.t.

Landsstýrismaðurin mælir til, at gjøldini eftir hesum uppskoti hækka við 750 kr. fyri akfør, ið nýta bensin sum drívmegi, og at útjavningargjaldið hækkar 500 kr. Harumframt verður mælt til, at viðfestivognar undir 3.500 kg heildarvekt hækka 350 kr., og viðfestivognar yvir 3.500 kg heildarvekt hækka 500 kr.

Endamálið við uppskotinum er at fáa til vega inntøkur til landskassan.

Lóg um vektgjald av motorakførum er frá 1982. Í 1992 hækkaði vektgjaldið, og mælt verður við hesum uppskoti til, at vektgjaldið aftur verður hækkað við virknaði fyri 2006.

Í 2004 var inntøkan av vektgjaldinum góðar 50 mió. kr. Í 2005 verður inntøkan góðar 52 mió. kr. Mett verður, at inntøkan í 2006 verður góðar 75 mió. kr.

Fyri ein vanligan familjubil, sum nýtir bensin sum drívmegi og vigar millum 1.101 kg. og 1.300 kg., kemur árliga vektgjaldið at fara úr 1.720 kr. upp í 2.470 kr., sum svarar til eina hækking upp á uml. 44%. Fyri sama bil við diesel sum drívmegi, fer vektgjaldið úr 2.440 kr. upp í 3.690 kr., sum svarar til eina hækking upp á uml. 51%.

Fyri ein stóran vøru- ella lastvogn yvir 12.000 kg. heildarvekt, sum nýtir diesel sum drívmegi, kemur vektgjaldið at fara úr 10.290 kr. upp í 11.540 kr. sum svarar til eina hækking upp á uml. 12%

Eisini verður skotið upp, at nýggja navnið hjá Bileftirliti Føroya, sum er Akstovan, verður sett í lógina. Hetta er ein fylgibroyting av, at stovnurin hevur fingið nýtt navn.

Kapittul 2. Avleiðingar av uppskotinum

Mett verður, at lógaruppskotið hevur fíggjarligar avleiðingar við sær fyri landið, vinnuna og borgarar, ið eru eigarar av einum akfari. Mett verður, at fíggjarligar avleiðingar av hesum verða umleið 23 mió. kr.

Mett verður ikki, at uppskotið hevur við sær nakrar umsitingarligar ellar umhvørvisligar avleiðingar.

Eiheldur verður mett, at uppskotið hevur avleiðingar við sær í mun til altjóða avtalur og reglur fyri landið, kommunur, ávísar samfelagsbólkar ella vinnuna. Heldur ikki verða sosialar avleiðingar fyri ávísar samfelagsbólkar.

Kapittul 3. Serligar viðmerkingar

Til § 1

Nr. 1

Broytingin hækkar øll gjøld eftir hesi lóg.

Nr. 2 til 7

Broytingin er ein fylgibroyting, av tí at Bileftirlit Føroya hevur fingið nýtt navn til Aksktovan.

Til § 2

Eingin viðmerking.

1. viðgerð 17. november 2005. Málið beint í fíggjarnevndina, sum tann 15. desember 2005 legði fram soljóðandi

Álit

Landsstýrið hevur lagt málið fram tann 8. november 2005, og eftir 1. viðgerð tann 17. november 2005 er tað beint fíggjarnevndini.

Nevndin hevur viðgjørt málið á fundum tann 21. og 24. november og 14. desember 2005.

Undir viðgerðini hevur nevndin havt fund við landsstýrismannin í fíggjarmálum.

Nevndin hevur undir viðgerðini býtt seg í ein meiriluta og ein minniluta.

Anfinn Kallsberg ger vart við, at inntøkan skal takast við í einari heildarætlan fyri samferðsluøkið.

Lisbeth L. Petersen, Kaj Leo Johannesen og Kristian Magnussen gera vart við, at uppskotið bert er ein liður í at fáa størri inntøkur í landskassan, og hevur einki við nakra heildarætlan á samferðsluøkinum at gera.

Meirilutin (Anfinn Kallsberg, Kristian Magnussen, Kaj Leo Johannesen  og Lisbeth L. Petersen)

tekur undir við málinum og mælir Løgtinginum til at samtykkja uppskotið.

Minnilutin (Páll á Reynatúgvu, Karsten Hansen og Kári P. Højgaard) metir, tað vera skeivt at hækka vektgjaldið í eini roynd at útvega landskassanum meira pening. Vektgjaldið tekur ikki hædd fyri, um brúkarin nýtir vegirnar nógv ella lítið, ella er stórur orkubrúkari ella ei. Minnilutin mælir ístaðin til at taka peningin inn við at hækka avgjaldið á autodieselolju og motorbensini samsvarandi. Minnilutin tekur ikki undir við málinum og mælir Løgtinginum frá at samtykkja tað.

2. viðgerð 19. desember 2005. §§ 1 og 2 samtyktar 18-0-10. Uppskotið fer soleiðis samtykt til 3. viðgerð.

Á tingfundi 20. desember 2005 løgdu tingmenninir Anfinn Kallsberg, Kristian Magnussen, Lisbeth L. Petersen, Kaj Leo Johannesen, Páll á Reynatúgvu, Karsten Hansen og Kári P. Højgaard fram soljóðandi

Broytingaruppskot 

til 

3. viðgerð

Í § 1, nr. 1 verður litra B orðað soleiðis:

Viðmerkingar:

Við hesum broytingaruppskoti verður vektgjaldið á hýruvognum, ið koyra við diesel sum drívmegi, javnsett við vanligar persónbilar.

Dømi: 1400 + 1360 er avgjald í alt fyri dieselbilar 2760. Tað sama úrslitið fær man, um man tekur persónbil í sama vektklassa 1830 + 930 er í alt 2760.

3. viðgerð 20. desember 2005. Broytingaruppskot frá Anfinn Kallsberg, Kristian Magnussen, Lisbeth L. Petersen, Kaj Leo Johannesen, Páll á Reynatúgvu, Karsten Hansen og Kára P. Højgaard til § 1 samtykt 25-2-5. Uppskotið, sum samtykt við 2. viðgerð, og soleiðis broytt við 3. viðgerð endaliga samtykt 20-1-11. Málið avgreitt.

Ll.nr. 157 frá 22.12.2005