Tunnil Oeravik-Hov

Ár 2005, 1. mars, legði Bjarni Djurholm, landsstýrismaður, vegna landsstýrið fram soljóðandi

Uppskot

til

løgtingslóg um at gera tunnil við tilhoyrandi vegasambandi millum Øravík og Hov

§ 1. Landsstýrismanninum verður heimilað at skipa fyri, at tunnil við tilhoyrandi vegasambandi verður gjørdur millum Øravík og Hov. Byggiútreiðslurnar til verkætlanina kunnu í mesta lagi vera 150 mió kr.

§ 2. Henda løgtingslóg kemur í gildi dagin eftir, at hon er kunngjørd.

Kap. 1. Almennar viðmerkingar

Endamálið við lógini er í fyrsta lagi at tryggja, at málið fær eina nøktandi politiska viðgerð, áðrenn verkætlanin verður framd. Eisini er ásett í játtanarskipanini, at tá talan er um størri íløgur, ið ofta fevna um fleiri fíggjarár, er meginreglan, at serstakt lógaruppskot verður lagt fyri Løgtingið. Sambært játtanarskipanini er neyðugt við serstakari verklagslóg, um landsstýrismaðurin skal kunna gera avtalur, sum eisini hava við sær útreiðslur í komandi fíggjarárum. Leggjast kann afturat, at fíggjarnevndin í álitinum til fíggjarlógaruppskotið fyri 2005 hevur skrivað, at verklagslógir eiga at verða gjørdar fyri allar verkætlanir, har samlaði kostnaðurin er meira enn 3 mió kr.

Í lógartekstinum fær landsstýrismaðurin heimild at skipa so fyri, at tunnil við tilhoyrandi vegasambandi verður gjørdur millum Øravík og Hov, og kunnu byggiútreiðslurnar í mesta lagi vera 150 mió kr. tilsamans. Um samlaði løgukostnaðurin er ásettur í lógini, kann landsstýrismaðurin sambært játtanarskipanini gera avtalur, sum hava við sær útreiðslur í komandi fíggjarárum, um so er, at hetta er neyðugt fyri at gera skilagóðar sáttmálar og treytað av, at tann samlaði løgukostnaðurin verður hildin. Skuldi tað eftir útbjóðingina víst seg, at sáttmálakostnaðurin verður so høgur, at samlaðu byggiútreiðslurnar væntandi verða hægri enn ásett í verklagslógini, verður neyðugt at broyta lógina, áðrenn landið bindur seg í sáttmálum við privatar arbeiðstakarar.

Ein samtykt verklagslóg er tó eingin trygd fyri, at kostnaðurin ikki verður hægri enn ásett í lógartekstinum, um tað, eftir at sáttmáli er undirskrivaður, t.d. vísir seg, at umstøðurnar eru øðrvísi í mun til fortreytirnar fyri sáttmálunum. Víst verður í hesum sambandi til almennu viðmerkingarnar til uppskotið til verklagslóg at gera samferðsluhavn á Syðradali (ll. nr. 15 frá 20. februar 2003).

Í seinnu helvt av 90’unum vórðu jarðfrøðiligar kanningar gjørdar í økinum, herundir royndarboringar og seismiskar kanningar, og frægasta jarðfrøðiliga farleiðin varð funnin til tunnilsgerð.

Í 2001-2002 vórðu tunnil og vegateinar báðumegin við projekteraðir, og var ætlanin at gera inntøkini í 2002, men hetta varð av ongum. Áðrenn gongd kom á arbeiðið í 2003, var tankin um eina nýggja linjuføring væl lægri í lendinum í einum jarðfrøðiliga truplum øki komin fram, men av tí at henda linjuføring samfelagsliga og ferðslutekniskt liggur betri, og at tøknin er nógv ment, varð avgjørt at kanna nýggju linjuføringina í samstarvi við geologar og aðrar ráðgevar.

Neyðugar forkanningar og metingar vórðu gjørdar í nýggja økinum í 2004, og valið fall á nýggju linjuføringina. Projekteringin er farin fram í endanum av 2004 og byrjanini av 2005.

Samlaða verkætlanin er tilsamans 4.677 metrar til longdar, harav 2.437 metrar av tunnli og 2.240 metrar av vegi. Øravíkarmegin er talan um dagføring og nýgerð av 1.790 metrum av vegi, frá norðan fyri Øravík til Tjaldarvíksbrekkur, har tunnilin byrjar.

Tunnilin hevur Øravíkarmegin innslag í Tjaldarvíksbrekkum og Hovsmegin undir hamarinum við Torvsheygg, t.e. um 200 metrar í ein útnyrðing, har landsvegurin fer um Hovsá.

Tunnilin er ein sokallaður T 9,5 tunnil, sum er ein 9,5 m breiður tunnil (í neðra), við 7 m vegabreyt. Atkomuvegirnir eru 7 m breiðir við 1,25 m breiðari vegøksl á hvørjari síðu. Hovsmegin kemur vegurin í verandi landsveg umleið 450 metrar frá munnanum.

Tað kann koma fyri, at smærri frávik verða gjørd í mun til verkætlanina, um tað verður mett skilagott.

Forprojektið er liðugt, og eftir ætlan verður útbjóðingartilfarið liðugt medio apríl 2005.

Uppskotið hevur ikki verið til ummælis, men er gjørt í samstarvi við Landsverk.

Byggiútreiðslurnar til verkætlanina verða mettar til uml. 150 mió kr. Av hesum eru uml. 10 mió kr. til dagføring av vegnum í Øravík, men kann býtið millum hesa dagføring og restina av verkætlanini víkja nakað frá metingini. Ætlanin er at bjóða arbeiðið út í innbodnari lisitatión við prekvalifisering og at gera bindandi sáttmála, sum fevnir um alla verkætlanina. Metti fíggjartørvurin er á leið hesin:

Neyðugt verður at játta hesar upphæddir á fíggjarlógini, og verður tí lítið rúm fyri øðrum stórum verkætlanum innan vegaøkið í hesum tíðarskeiði.

Tað ber ikki til neyvt at meta um byggikostnaðin, fyrr enn tilboðini eru komin inn. Um tað, eftir at tilboðini eru komin inn, verður mett, at byggiútreiðslurnar væntandi verða størri enn 150 mió kr., verður neyðugt at leggja uppskot fyri Løgtingið um at broyta verklagslógina.

Nýggjar útreiðslur standast av at reka og viðlíkahalda tunnilin, men hinvegin verða útreiðslur til rakstur og víðlíkahald av verandi vegi spardar. Tilsamans verður talan um ein eyka kostnað, sum er uml. 200 tús. kr. árliga. Neyðugt verður tí at hækka rakstrarjáttanina hjá Landsverki við 200 tús. kr., um rakstur og viðlíkahald av landsvegakervinum annars ikki skal versna.

Uppskotið hevur væntandi smávegis positivar fíggjarligar avleiðingar fyri kommunur í Suðuroy, av tí at meira virksemi verður í oynni.

Uppskotið hevur smávegis umsitingarligar avleiðingar á Landsverki, sum skal standa fyri útbjóðing og eftirliti.

Uppskotið hevur smávegis umhvørvisavleiðingar. Teinurin at koyra verður nakað styttri, og tunnilin liggur væl lægri enn verandi vegur. Sostatt minkar nýtslan av brennievni nakað. Verkætlanin hevur væntandi positivar avleiðingar fyri ferðslutrygdina.

Uppskotið hevur væntandi positivar sosialar avleiðingar fyri Suðuroynna, tí flutningssambandið verður betri.

Í lógargreinini verður heimilað landsstýrismanninum at skipa so fyri, at tunnil verður gjørdur millum Øravík og Hov, og at byggiútreiðslurnar fyri verkætlanina í mesta lagi kunnu vera 150 mió kr. Við byggiútreiðslur er at skilja tær samlaðu ódiskonteraðu útreiðslurnar til arbeiðið, t.v.s. sáttmálakostnaður, eftirlit, v.m. Útreiðslurnar til forkanningar og prosjektering eru ikki partur av byggiútreiðslunum.

1. viðgerð 14. mars 2005. Málið beint í vinnunevndina, sum tann 31. mars 2005 legði fram soljóðandi

Landsstýrið hevur lagt málið fram tann 1. mars 2005, og eftir 1. viðgerð tann 14. mars 2005 er tað beint vinnunevndini.

Undir viðgerðini hevur nevndin havt fund við landsstýrismannin í vinnumálum, saman við landsverkfrøðinginum.

Frá landsverkfrøðinginum fekk nevndin at vita, at friðingarmyndugleikarnir eru eftirspurdir, men at svar enn ikki er komið hesum viðvíkjandi.

Ein samd nevnd tekur undir við málinum, og mælir Løgtinginum til at samtykkja uppskotið.

2. viðgerð 6. apríl 2005. §§ 1 og 2 samtyktar 23-0-0. Uppskotið fer soleiðis samtykt til 3. viðgerð.

3. viðgerð 13. apríl 2005. Uppskotið, sum samtykt við 2. viðgerð, endaliga samtykt 29-0-0. Málið avgreitt.

	Fyri landið/ landsmyndug-leikar	Fyri kommunalar myndugleikar	Fyri pláss/øki í landinum	Fyri ávísar samfelagsbólkar/ felagsskapir	Fyri vinnuna
Fíggjarligar/ búskaparligar avleiðingar	Ja	(Ja)	Ja	Nei	Ja
Umsitingarligar avleiðingar	(Ja)	Nei	Nei	Nei	Nei
Umhvørvisligar avleiðingar	(Ja)	Nei	Nei	Nei	Nei
Avleiðingar í mun til altjóða avtalur og reglur	Nei	Nei	Nei	Nei	Nei
Sosialar avleiðingar			Ja	Nei