Toll- og Skattafyrisiting

Ár 2005, 26. januar, legði Bárður Nielsen, landsstýrismaður, vegna landsstýrið fram soljóðandi

Uppskot

til

løgtingslóg um broyting í løgtingslóg um Toll- og Skattafyrisiting

§ 1

Í løgtingslóg nr. 169 frá 30. desember 1997 um Toll- og Skattafyrisiting, sum seinast broytt við løgtingslóg nr. 100 frá 20. desember 2002, verður henda broyting gjørd:

Í § 22, eftir stk. 6 verður sum nýtt stk. sett:

“Stk. 7. Landsstýrismaðurin ásetir í kunngerð reglur um starvsskipan og freistir í sambandi við kæruviðgerð hjá Skatta- og Avgjaldskærunevndini.”

§ 2

Henda løgtingslóg kemur í gildi dagin eftir, at hon er kunngjørd.

Almennar viðmerkingar
Landsstýrismaðurin í fíggjarmálum leggur við hesum fram lógaruppskot, har mælt verður til, at landsstýrismaðurin fær heimild at áseta reglur fyri kæruviðgerðini hjá Skatta- og Avgjaldskærunevndini.

Lóg um Toll- og Skattafyrisiting varð sett í gildi 1. januar 1998. Føroya Kærustovnur hevur virkað sum skrivstova hjá Skatta- og Avgjaldskærunevndini síðan 1. juni 1998. Royndirnar frá kæruviðgerðini í hesum tíðarskeiði gera, at mett verður, at tíðin nú er komin til at fáa gjørt eina starvsskipan fyri nevndina.

Í hesum tíðarskeiði hava ymiskir spurningar stungið seg upp. Spurningar, sum ikki kunnu svarast út frá teimum fáu greinunum um Skatta- og Avgjaldskærunevndina í lóg um Toll- og Skattafyrisiting. Í flestu førum metir nevndin seg hava funnið fram til hóskandi mannagongdir. Men ásannast má, at best hevði verið, um ein starvsskipan varð gjørd fyri nevndina, sum tók støðu til flestu spurningarnar viðvíkjandi kærugongdini soleiðis, at øll eru greið yvir, hvussu kæruviðgerðin fer fram. Hetta hevði eisini gjørt, at meiri opinleiki var um kærugongdina, og at kærarin hevði verið fullgreiður yvir, hvørji krøv verða sett honum, og hvørji rættindi hann hevur.

Til samanberingar kann nevnast, at lóg um Toll- og Skattafyrisiting gevur landsstýrismanninum heimild til at gera eina starvsskipan, sum kommunalu skattakærunevndirnar skulu arbeiða eftir, smb. § 15, stk. 1. Við hesari heimild er kunngerð um starvsskipan fyri kommunalar skattakærunevndir gjørd. Líknandi heimild er ikki ásett í lógini fyri Skatta- og Avgjaldskærunevndina.

Við hesum verður gjørd heimild til at áseta reglur fyri Skatta- og Avgjaldskærunevndina.

Lógaruppskotið hevur ongar avleiðingar fyri umhvørvið ella avleiðingar í mun til altjóða avtalur og reglur. Uppskotið hevur heldur ikki við sær fíggjarligar avleiðingar fyri land, kommunur og fyri pláss/øki í landinum. Mett verður ikki, at lógaruppskotið hevur sosialar avleiðingar við sær fyri ávísar samfelagsbólkar ella felagsskapir, harafturímóti hevur tað fíggjarligar avleiðingar fyri hesar bólkar og fyri vinnuna.

Til § 1

Ætlanin er, at kunngerð skal gerast, sum ásetir mannagongdina fyri innlatan av kæru, nevndarviðgerðini, umboðan, afturkalling, uppafturtøku o.s.fr.

1. viðgerð 2. februar 2005. Málið beint í fíggjarnevndina, sum tann 10. februar 2005 legði fram soljóðandi

Landstýrið, hevur lagt málið fram tann 26. januar 2005, og eftir 1. viðgerð tann 2. februar 2005 er tað beint fíggjarnevndini.

Ein samd nevnd tekur undir við málinum, og mælir Løgtinginum til at samtykkja uppskotið.

2. viðgerð 16. februar 2005. §§ 1 og 2 samtyktar 27-0-0. Uppskotið fer soleiðis samtykt til 3. viðgerð.

3. viðgerð 24. februar 2005. Uppskotið, sum samtykt við 2. viðgerð, endaliga samtykt 21-0-0. Málið avgreitt.

	Fyri landið/ landsmyndugleikar	Fyri kommunalar myndugleikar	Fyri pláss/øki í landinum	Fyri ávísar samfelagsbólkar/ felagsskapir	Fyri vinnuna
Fíggjarligar/ búskaparligar avleiðingar	Nej	Nej	Nej	Nej	Nej
Umsitingarligar avleiðingar	Nej	Nei	Nei	Nei	Nej
Umhvørvisligar avleiðingar	Nei	Nei	Nei	Nei	Nei
Avleiðingar í mun til altjóða avtalur og reglur	Nei	Nei	Nei	Nei	Nei
Sosialar avleiðingar				Nei

Almennar viðmerkingar Landsstýrismaðurin í fíggjarmálum leggur við hesum fram lógaruppskot, har mælt verður til, at landsstýrismaðurin fær heimild at áseta reglur fyri kæruviðgerðini hjá Skatta- og Avgjaldskærunevndini.

Til § 1

Almennar viðmerkingar
Landsstýrismaðurin í fíggjarmálum leggur við hesum fram lógaruppskot, har mælt verður til, at landsstýrismaðurin fær heimild at áseta reglur fyri kæruviðgerðini hjá Skatta- og Avgjaldskærunevndini.