Mál í Landsstýrismálanevndini - skjøl 2000

LØGTINGIÐ - Landsstýrismálanevndin
______________________________________________________________

Fiskimálastýrið
Att.: Jørgen Niclasen, landsstýrismaður
Yviri við Strond 17-19
Postsmoga 87
FO-110 Tórshavn

Viðvíkjandi málinum um tunfiskaloyvir, tygara j. nr. 20000342-9/140

Á fundi í landsstýrismálanevndini tann 13. september 2000 varð gjørt av at taka omanfyrinevnda mál upp til viðgerðar. Vísandi til § 6, stk. 1, í starvsskipan nevndarinnar, verða tygum tí biðin um ummæli í málinum, serliga við atliti til spurningin um, hví Fiskimálastýrið metir seg at hava virkað innan karmar lógarinnar. Hjálagt er avrit av starvsskipanini.

Í sambandi við viðgerðina av málinum ynskir landsstýrismálanevndin eisini at fáa svarað hesum spurningum:

• Hvat eru tær ítøkiligu grundgevingarnar fyri at nokta nøkrum av umsøkjarunum tilsøgn um royndarloyvi eftir tuni?
• Hava útlendsk skip veruliga rindað samsýning fyri at fáa royndarloyvi til viðkomandi, sum hevur havt tilsøgn um royndarloyvi, og í so føri, tekur landsstýrismaðurin undir við hesum?
• Hví hevur landsstýrið valt at nýta føroyskar millummenn?
• Hvat var grundgevingin hjá landsstýrismanninum fyri ikki at lata eitt starv innan landsumsitingina hjá einum av umsøkjaranum fáa avgerandi týdning, tá støða skuldi takast til, um viðkomandi skuldi fáa tilsøgn um royndarloyvi?

Til kunningar verður lagt við upprit frá skrivaranum hjá landsstýrismálanevndini, dagfest 8. september 2000, ið viðger spurningin, um tað er í samsvari við galdandi lóggávu at selja/umseta tilsøgnir um royndarloyvir.

Svarfreistin er sett til 9. oktober 2000. 

Kristina Samuelsen
nevndarskrivari