33. fundur

Ár 2003, fríggjadagin 5. desember kl. 10.15, varð tingfundur settur.

Løgtingsmenninir Johan Dahl og Bárður Nielsen vóru ikki á fundi.

Tikið av dagsskrá:
Svar upp á fyrispurning nr. 100-21/2003 til Anfinn Kallsberg, løgmann, frá Hergeir Nielsen, løgtingsmanni, viðvíkjandi rættartrygdini í ríkisrættinum, svar upp á fyrispurning nr. 100-19/2003 til Bill Justinussen, landsstýrismann, frá Heðini Mortensen, løgtingsmanni, viðvíkjandi viðlíkahaldi av Landssjúkrahúsinum og svar upp á fyrispurning nr. 100-20/2003 til Annitu á Fríðriksmørk, landsstýrismann, frá Heðini Mortensen, løgtingsmanni, viðvíkjandi Landsskjalasavninum.

Serlig fráboðan:
Løgmaður fekk, sambært § 51, stk. 3 í tingskipanini, uttan um skránna, orðið at geva Løgtinginum serliga fráboðan.

Løgmaður boðaði frá, at hann í dag hevur loyst landsstýrismenninar Høgna Hoydal, Karsten Hansen, Páll á Reynatúgvu og Annitu á Fríðriksmørk úr embæti teirra sum landsstýrismenn, og at løgmaður fyribils situr fyri málsøkjunum, ið tey hava sitið fyri sum landsstýrismenn.

Síðani heitti løgmaður á løgtingsformannin um, samsvarandi løgtingslóg nr.103 frá 26. juli 1994 um stýrisskipan Føroya, § 29, at loysa seg úr embætinum sum løgmaður Føroya.

At enda gjørdi løgmaður kunnugt, at samsvarandi løgtingslóg nr. 103 frá 26. juli 1994 um stýrisskipan Føroya, § 31 og § 6,1. stk verður nýval til Løgtingið 20. januar 2004.

Formaðurin boðaði frá, at tingarbeiði vanliga heldur uppat, tá ið nýval er útskrivað, men neyðugt er, at Løgtingið samtykkir eina bráðfeingis fíggjarlóg fyri 2004 og verður næsti fundur lýstur á vanligan hátt.

 Fundur lokin kl. 10.20.  

Edmund Joensen
løgtingsformaður

/Marius Rein
skrivari