Ár 2001, fríggjadagin 21. september, kl. 10.00, varð tingfundur settur í útvarpshøllini.

Løgtingsmenninir Katrin D. Jakobsen og Heðin Mortensen, og Bjarni Djurholm, landsstýrismaður, vóru ikki á fundi.

Farloyvi:
Skriv frá Alfred Olsen, dagfest 20. september 2001, við umsókn um farloyvi, frá 21. september 2001, og at næsti maður á lista Sambandsfloksins í Eysturoya valdømi tekur sæti á tingi. Formaðurin heitti á løgtingsmenninar Eyðun Viderø, Páll á Reynatúgvu og Hergeir Nielsen um at kanna valbrøvini fyri Sambandsflokkin í Eysturoyar valdømi. Eyðun Viderø mælti til, vegna seg sjálvan, Páll á Reynatúgvu og Hergeir Nielsen, at Jákup Lamhauge tekur sæti á tingi fyri Alfred Olsen.
Samtykt uttan atkvøðugreiðslu.

Til viðgerðar:

1. Atkvøðugreiðsla um fyrispurning nr. 100-13/2001 til Bjarna Djurholm, landsstýrismann í samferðslumálum, frá Jenis av Rana, løgtingsmanni, um fyribyrging móti ferðsluvanlukkum.
   Samtykt uttan atkvøðugreiðslu, at fyrispurningurin skal svarast.
   
2. Atkvøðugreiðsla um fyrispurning nr. 100-14/2001 til Óla Holm, landsstýrismann, frá Jógvan á Lakjuni, løgtingsmanni, viðv. lurtaragjaldi og framtíðar loftmiðlapolitikki.
   Samtykt uttan atkvøðugreiðslu, at fyrispurningurin skal svarast.
   
3. Atkvøðugreiðsla um fyrispurning nr. 100-15/2001 til Bjarna Djurholm, landsstýrismann, frá Marjus Dam, løgtingsmanni, viðvíkjandi siglingini um Vestmannasund.
   Samtykt uttan atkvøðugreiðslu, at fyrispurningurin skal svarast.
   
4. 2. viðgerð av tingmáli nr. 5/2001: Uppskot til løgtingslóg um at taka yvir málini og málsøkini á lista A í heimastýrislógini (Yvirtøkulógin).
   

Fundur niðurlagdur kl.12.00.
Fundur uppafturtikin kl.13.30.

§§ 1 og 2 samtyktar 18-0-9. Uppskotið fer soleiðis samtykt til 3. viðgerð.

5. Framløga.
   Formaðurin boðaði frá, at Karsten Hansen, landsstýrismaður, vegna landsstýrið, hevur lagt fram tingmál nr. 1-2/2001: Uppskot til eykajáttanarlóg september 2001, at Sámal Petur í Grund, landsstýrismaður, vegna landsstýrið, hevur lagt fram tingmál nr. 8/2001: Uppskot til løgtingslóg um broyting í løgtingslóg um Trivnaðar- og heilsuráð, og at vinnunevndin hevur lagt fram álit í tingmáli nr. 3/2001: Uppskot til løgtingslóg um postvirksemi.

Tikið av dagsskrá:
2. viðgerð av tingmáli nr. 4/2001: Uppskot til samtyktar um at seta pening í grunn til hækkan av pensjónum, og 2. viðgerð av tingmáli nr. 6/2001: Uppskot til løgtingslóg um fyribils úrgildissetan av løgtingslógini um serligt avgjald á brenniolju.

Formaðurin fráboðaði fyrispurning nr. 100-16/2001 til Anfinn Kallsberg, løgmann, frá Edmund Joensen, løgtingsmanni, um yvirtøku av dómsvaldinum

Formaðurin setti næsta fund at verða týsdagin 25. september 2001, kl. 13.30, við hesi dagsskrá:

1. Atkvøðugreiðsla um fyrispurning nr. 100-16/2001 til Anfinn Kallsberg, løgmann, frá Edmund Joensen, løgtingsmanni, um yvirtøku av dómsvaldinum.
2. 1. viðgerð av tingmáli nr. 1-2/2001: Uppskot til eykajáttanarlóg september 2001.
   Málið verður beint í fíggjarnevndina.
3. 1. viðgerð av tingmáli nr. 8/2001: Uppskot til løgtingslóg um broyting í løgtingslóg um Trivnaðar- og heilsuráð.
   Málið verður beint í trivnaðarnevndina.
4. Svar upp á fyrispurning nr. 100-7/2001 til Sámal P. í Grund, landsstýrismann, frá Lisbeth L. Petersen, løgtingsmanni, um játtan til sjúkrahúsverkið.
5. Framløga.

Fundur lokin kl. 16.15. 

Finnbogi Ísakson
løgtingsformaður

/Marius Rein
skrivari