56 Uppskot til løgtingslóg um broyting í løgtingslóg um skatting av kapitalvinningi
A. Upprunauppskot
B. 1. viðgerð (Orðaskifti)
Ár 2008, 10. desember, løgdu Høgni Hoydal, Tórbjørn Jacobsen, Annita á Fríðriksmørk, Heini O. Heinesen, Bergtóra Høgnadóttir Joensen, Hergeir Nielsen, Bjørt Samuelsen og Sjúrður Skaale vegna Tjóðfeldi fram soljóðandi
§ 1. Í løgtingslóg nr. 164 frá 21. desember 2001 um skatting av kapitalvinningi, sum seinast broytt við løgtingslóg nr. 49 frá 16. mai 2006, verða gjørdar hesar broytingar:
1) § 1, nr. 7 verður strikað.
2) § 10, stk. 3 verður strikað og stk. 4 verður hereftir stk. 3.
3) § 14, stk. 4 verður strikað.
§ 2. Henda løgtingslóg kemur í gildi dagin eftir, at hon er kunngjørd og hevur virknað fyri skatt av kapitalvinningi, sum verður álíknaður fyri skattaár, sum byrja 1. januar 2009 ella seinni.
Stk. 2. Lógin er ikki galdandi fyri rentuskuld, sum er íkomin áðrenn 1. januar 2010, og sum stavar frá lántøku, ið er tikin áðrenn framløgudagin í Løgtinginum av hesum lógaruppskoti.
Kap. 1. Almennar viðmerkingar
Í 2006 gjørdi ein meiriluti í Fíggjarnevndini (Anfinn kallsberg, Vilhelm Johannesen og Kaj Leo Johannesen) eitt broytingaruppskot til lógina um kapitalvinningsskatt, sum gevur ein serligan skattafyrimun til privatfólk, um tey lána sær pening at keypa partabrøv fyri. Tey fingu nú møguleika at draga renturnar av lánum frá.
Hóast andstøðan og onkur einstakur samgongulimur ávaraðu staðiliga ímóti hesi óviðgjørdu broyting, varð hon samtykt við atkvøðunum hjá samgonguflokkunum.
Grundgevingarnar fyri lógarbroytingini vóru ongar, men grundgevingarnar ímóti eru greiðar:
Samanumtikið:
- Hetta hevur verið ringt fyri fíggjarmarknaðin og fyri eitt burðardygt vinnulív og haldførar íløgur.
- Tað hevur verið ringt fyri búskapin.
- Ringt fyri landskassan.
- Ringt fyri samhaldsfesti í samfelagnum.
- Og tað hevur verið ringt fyri tey, ið hava sett seg í skuld at keypa partabrøv, sum nú hava mist virðið og mugu realiserast. Og her er ikki bara talan um múgvandi fólk, men vanlig fólk við meðalinntøku, sum av landsstýrinum og fíggingarstovnunum hava verið eggjað til at seta seg í hesa skuld.
Tí verður mælt til at rætta skeivleikan beinanvegin og strika henda møguleika frameftir. Fyri tey, ið longu hava sett seg í skuld og eru komin í trupulleikar av hesum politikki undanfarna landsstýrisins, verður tó ikki lóggivið aftureftir.
Serligar viðmerkingar
Til § 1
Ad. 1 og 2) Við broytingini fer ikki longur at bera til at mótrokna rentur av lánum, ið eru tikin í sambandi við keyp av virðisbrøvum, í kapitalvinningi. Víst verður tó til viðmerkingarnar til skiftisregluna í § 2, stk. 2.
Ad. 3) Samstundis, sum møguleikin dettur burtur at mótrokna rentuútreiðslur í kapitalvinningi í sambandi við keyp av virðisbrøvum, verður eisini møguleikin at framflyta rentútreiðslur til mótrokning í kapitalvinningi 5 ár fram tikin av. Hetta er tó ikki galdandi fyri rentuskuld, sum er íkomin. Víst verður í hesum sambandi til viðmerkingarnar til skiftisregluna í § 2, stk. 2.
Tá eingin onnur heimild er í lógini at mótrokna rentur í kapitalvinningi, enn ásetingin í § 10, stk. 3, sum mælt verður til at strika, hevur ásetingin í § 14, stk. 4 einki sjálvstøðugt innihald longur.
Til § 2
Gildiskoman er sett til dagin eftir, at lógin er kunngjørd, og hevur lógin virknað fyri skatt av kapitalvinningi, sum verður álíknaður fyri skattaár, sum byrja 1. januar 2009 ella seinni. Hetta er neyðugt, fyri ikki at áleggja umsitingini óneyðugt arbeiði við periodisering av kapitalvinningsskatti í einum skattaári. Um útlit ikki eru til, at lógin verður samtykt og kunngjørd áðrenn 1. januar 2009, má spurningurin um, nær lógin skal hava virknað, takast upp í Løgtinginum. Ígildisásetingin kemur tó ikki í andsøgn við § 41, stk. 2 í Stýrisskipanarlógini, ið ásetir, at: “Beinleiðis ella óbeinleiðis skattur kann ikki verða álagdur fyri inntøkur, innflutning, útflutning, sølu, gjald ella tílíkt, sum er farið fram í tíðini, áðrenn løgtingslógaruppskot um hetta varð lagt fyri Løgtingið.”
Skiftisreglan inniber, at ásetingarnar, sum skotið verður upp at strika við hesum uppskotinum, framhaldandi verða galdandi fyri rentuskuld, sum er íkomin áðrenn 1. januar 2010, og sum stavar frá lántøku, ið er tikin áðrenn framløgudagin í Løgtinginum av hesum lógaruppskoti. Gildi er tó avmarkað til tey 5 árini aftaná 1. januar 2010, sum eru nevnd í § 14, stk. 4. Tað er ikki av tilvild at orðið rentuskuld er nýtt í ásetingini í staðin fyri orðið renta. Skiftisreglan fevnir nevniliga bert um rentuskuld og ikki um rentur, sum eru íkomnar eftir 1. januar 2010, hetta hóast hesar stava frá lántøku, ið er tikin áðrenn framløgudagin í Løgtinginum av hesum lógaruppskoti. Ikki íkomnar rentur, ið fólk kunnu sleppa sær undan við at rinda lánini aftur áðrenn 1. januar 2010, kunnu sostatt ikki mótroknast í kapitalvinningi eftir 1. januar 2010.