044.08 Umsorgararbeiði

44 Uppskot til løgtingslóg um broyting í løgtingslóg um stuðul til umsorgararbeiði

A. Upprunauppskot
B. 1. viðgerð (Orðaskifti)
C. Álit
D. Frávik
E. 2. viðgerð (Orðaskifti)
F. 3. viðgerð (Orðaskifti)

Ár 2008, 3. desember, legði Rósa Samuelsen, landsstýriskvinna, fram soljóðandi

Uppskot

til

løgtingslóg um broyting í løgtingslóg um stuðul til umsorgararbeiði

§ 1

Í løgtingslóg nr. 46 frá 9. mai 2005 um stuðul til umsorgararbeiði, sum seinast broytt við løgtingslóg nr. 127 frá 21. desember 2006, verða gjørdar hesar broytingar:

1) § 2, stk. 1 verður orðað soleiðis:

”§ 2. Stuðul sambært hesi lóg kann latast til mattænastu, koyritænastu og vitjanartænastu.

2) Í § 3 verða stk. 2 og 3 strikað.

Stk. 4 verður hereftir stk. 2.

3) Í § 4, stk. 1 verður “Kærunevndina í

almannamálum” broytt til: ”Kærunevndina

í almanna- og heilsumálum”.

§ 2

Henda løgtingslóg kemur í gildi dagin eftir, at hon er kunngjørd.

Kap. 1. Almennar viðmerkingar

Hetta uppskotið verður lagt fyri tingið, sum ein liður í royndunum hjá sitandi samgongu at minka um vøksturin í almennu útreiðslunum. Við uppskotinum verður ikki longur heimild hjá landinum at játta stuðul til dagtilhald.

Kap. 2. Avleiðingar av uppskotinum.

Í 2008 komu umsóknir um dagtilhald fyri í alt 5,6 mió. kr., og Almannastovan læt 3,9 mió. í stuðli til hetta virksemið. Almannastovan hevur í løtuni liggjandi umsóknir frá kommununum til dagtilhald fyri í alt 5,3 mió. kr. í 2009.

Kommunurnar kunnu fáa trupulleikar við at fíggja hetta virksemið í 2009, tí fíggjarætlanirnar eru ivaleyst longu samtyktar og skulu góðkennast av landsstýrinum áðrenn 1. desember.

	Fyri landið/lands- myndugleikar	Fyri kommunalar myndugleikar	Fyri pláss/øki í landinum	Fyri ávísar sam- felagsbólkar/ felagsskapir	Fyri vinnuna
Fíggjarligar/ búskaparligar avleiðingar	Ja	Ja	Ja	Ja	Nei
Umsitingarligar avleiðingar	Ja	Ja	Nei	Nei	Nei
Umhvørvisligar avleiðingar	Nei	Nei	Nei	Nei	Nei
Avleiðingar í mun til altjóða avtalur og reglur	Nei	Nei	Nei	Nei	Nei
Sosialar avleiðingar				Ja

Kap. 3. Serligar viðmerkingar

Til § 1, nr. 1

Við hesari ásetingini verður umsorgararbeiðið, sum tað almenna letur stuðul til, avmarkað til at fevna um mattænastu, koyritænastu og vitjanartænastu.

Til § 1, nr. 2

Tá dagtilhald ikki longur eru fevnd av virkseminum, sum stuðul verður veittur til, verða reglurnar um rættin hjá landsstýrismanninum at gera býtislykil og serstaka raðfesting fyri hendan stuðulin avtiknar.

Til § 1, nr. 3

Talan er einans um eina rætting av heitinum á kærunevndini.

Til § 2:

Gildiskomuregla

Hesir tingmenn viðmæla, sambært § 54, stk. 2 í tingskipanini, at málið kann verða lagt fram og fáa viðgerð:

Jaspur Vang	Bjarni Djurholm	Heðin Zachariasen	Helgi Abrahamsen
Jákup Mikkelsen	Poul Michelsen	Anfinn Kallsberg	Jógvan á Lakjuni
Magni Laksáfoss	John Johannessen	Andrias Petersen	Alfred Olsen
Eyðgunn Samuelsen	Gerhard Lognberg	Mikkjal Sørensen	Óli Breckmann
Katrin Dahl Jakobsen

1. viðgerð 10. desember 2008. Málið beint í Trivnaðarnevndina, sum tann 11. desember 2008 legði fram soljóðandi

Álit

Landsstýrið hevur lagt málið fram tann 3. desember 2008, og eftir 1. viðgerð 10. desember 2008 er tað beint Trivnaðarnevndini.

Nevndin hevur viðgjørt málið á fundi tann 11. desember 2008.

Undir viðgerðin hevur nevndin býtt seg í ein meiriluta og ein minniluta.

Landsstýrismaðurin er komin eftir, at broyting eigur at gerast í uppskotinum fyri at fáa yvirgangsreglur, og hevur við skrivi heitt á nevndina um at leggja broytingina fyri Løgtingið.

Meirilutin(Jákup Mikkelsen, Andrias Petersen, Jaspur Vang, Helgi Abrahamsen) tekur undir við áheitanini frá landsstýrismanninum og setur fram soljóðandi:

b r o y t i n g a r u p p s k o t

Í § 2 verður sum nýtt stk. sett:

“Stk. 2. Umsóknir, sum eru latnar inn i seinasta lagi 1. sept. 2008, skulu vera avgreiddar i seinasta lagi 1. mars 2009. Hava tiltøk ella fyriskipanir, sum framhaldandi verða fevndar av lógini, fingið stuðul i játtanarárinum 2008, kann tilsøgn gevast til framhald av virkseminum i játtanarárinum 2009, til umsóknin er endaliga viðgjørd. Tilsøgnin er treytað av, at neyðug játtan er til taks á løgtingsfíggjarlógini.”

Soleiðis broytt tekur meirilutin undir við málinum og mælir Løgtinginum til at samtykkja uppskotið.

Minnilutin (Karsten Hansen, Tórbjørn Jacobsen og Bergtóra Høgnadóttir Joensen) viðmerkir, at orsakað av tí, at samgongumeirilutin hevur noktað fyri at málið yvirhøvur kundi viðgerast og lýsast, sær minnilutin seg ikki føran fyri, at skriva álit í málinum og staðfestir harumframt at meirilutin við sínum arbeiðshátti hevur suspenderað parlamentarismuna undir núverandi heimastýrisstjórn.

Á tingfundi 12. desember 2008 var atkvøtt um uppskot frá Jákup Mikkelsen, Helga Abrahamsen, Jaspur Vang, Andrias Petersen, Bjarna Djurholm, Alfred Olsen og Eyðgunn Samuelsen um frávik sbr. § 85 í tingskipanini á øllum viðgerðarstigum. Samtykt 18-0-10.

2. viðgerð 12. desember 2008. Uppskot frá Karsten Hansen um at beina málið aftur í nevnd fall 9-3-14. Broytingaruppskot frá meirilutanum í Trivnaðarnevndini, Jákup Mikkelsen, Andrias Petersen, Jaspur Vang, Helga Abrahamsen, samtykt 16-0-9. Uppskotið soleiðis broytt samtykt 16-0-9. Uppskotið fer soleiðis samtykt til 3. viðgerð.

3. viðgerð 12. desember 2008. Uppskotið, sum samtykt við 3. viðgerð, endaliga samtykt 18-0-8. Málið avgreitt.

Ll.nr. 107 frá 12.12.2008