075.06 Fastur Gerðarrættur

Ár 2007, 2. mars, legði Bjarni Djurholm, landsstýrismaður, vegna landsstýrið fram soljóðandi

Uppskot

til

løgtingslóg um broyting í løgtingslóg um mál, ið hoyra undir fasta gerðarrættin

§ 1

Í løgtingslóg nr. 21 frá 11. apríl 2006 um mál, ið hoyra undir fasta gerðarrættin, verður § 2, stk. 2 strikað.

§ 2

Henda løgtingslóg kemur í gildi dagin eftir, at hon er kunngjørd.

Kap. 1. Almennar viðmerkingar

Hetta uppskotið um løgtingslóg um broyting í løgtingslóg um mál, ið hoyra undir fasta gerðarrættin, er gjørt samstundis sum uppskotið til ríkislógartilmæli um broyting í “Lov om ændring af lov for Færøerne om rettens pleje”. Orsøkin til uppskotið, sum er gjørt eftir áheitan frá ríkismyndugleikunum, er, at § 2, stk. 2 í lógini um fastan gerðarrætt ásetir, at dómstólarnir eftir áheitan skulu skipa fyri vitnisavhoyringum og aðrari próvførslu. Ein slík áseting hoyrir heima í rættargangslógini og ikki í lógini um fasta gerðarrættin. Harumframt er rættargangur danskt málsøki, og er tað eisini ein orsøk til, at áðurnevnda áseting av røttum eigur at verða gjørd í rættargangslógini, ið ríkismyndugleikarnir varða av.

Ásetingin í § 2, stk. 2 verður strikað í lógini um mál, ið hoyra undir fasta gerðarrættin, og í staðin ásett sum § 343a í rættargangslógini.

Uppskotið hevur ikki verið til hoyringar, við tað at rættarstøðan á økinum verður óbroytt, orsakað av, at ásetingin í staðin verður sett í rættargangslógina.

Uppskotið hevur ikki fíggjarligar, umsitingarligar, umhvørvisligar, sosialar ella aðrar avleiðingar við sær.

Til § 1

Ásetingin í § 2, stk. 2, um at dómstólarnir eftir áheitan skulu skipa fyri vitnisavhoyringum og aðrari próvførslu, ið er neyðug fyri virkið hjá fasta gerðarrættinum, og at lov om voldgift verður nýtt samsvarandi, verður strikað. Hetta tí at ein slík áseting av røttum eigur at verða gjørd í rættargangslógini og nú verður sett inn í rættargangslógina sum § 343 a.

Til § 2

1. viðgerð 13. mars 2007. Málið beint í vinnunevndina sum tann 30. mars 2007 legði fram soljóðandi

Landsstýrismaðurin í vinnumálum hevur lagt uppskotið fram 2. mars 2007. Eftir 1. viðgerð 13. mars er tað beint í vinnunevndina.

Vinnunevndin hevur viðgjørt málið á fundi 26. og 29. mars 2007. Nevndin hevur havt fund við Bjarna Djurholm, landsstýrismann, og embætisfolk. Harumframt hevur nevndin havt fund við Henrik Møller, sorinskrivara. Kári á Rógvi, formaður í nevndini fyri fasta gerðarættin ynskti ikki at møta á fundi við nevndina fyrr enn nevndin hevði viðgjørt málið, og vísti annars til skriv til Vinnumálaráðið um taka málið um uppskotnu broytingina aftur.

Ein meiriluti (Henrik Old, Johan Dahl, Jørgen Niclasen, Heðin Zachariassen og Gerhard Lognberg) er av tí fatan, at ásetingin um at dómstólarnir eftir áheitan skulu skipa fyri vitnisavhoyringum og aðrari próvførslu eigur, sum skotið er upp, at verða ásett í rættargangslógini. Meirilutin tekur undir við uppskotinum, og mælir løgtingini at samtykkja uppskotið.

Minnilutin (Heidi Petersen og Tórbjørn Jacobsen) tekur ikki undir við løgtingsmáli no. 75/2006, um fastan gerðarætt. Málið er prinsipielt. Snýr seg um at lata vald frá løgtinginum til fólkatingið. Lata føroyskt ræði yvir í danskt ræði. Fasti Gerðarætturin hevur mælt frá at samtykkja uppskotið, og minnulutin tekur fult og heilt undir við teirra tilráðingum og argumentatiónum. Minnilutin mælir hervið løgtinginum til ikki at samtykkja løgtingsmál no. 75/2006.

2. viðgerð 24. apríl 2007. §§ 1 og 2 samtyktar 17-0-8. Uppskotið fer soleiðis samtykt til 3. viðgerð.

3. viðgerð 27. apríl 2007. Uppskotið, sum samtykt við 2. viðgerð, endaliga samtykt 18-0-9. Málið avgreitt.