Atkvøðugreiðslur og skrivligir fyrispurningar

Um atkvøðugreiðslur
og skrivligar fyrispurningar

Ivi hevur verið um, hvussu atkvøðast skal um uppskot til løgtingslógir. Tveir møguleikar eru: at seta fram broytingaruppskot og/ella atkvøða um ávísar greinar, stk. o.a. fyri seg.

Skal eitt broytingaruppskot verða samtykt krevst, at fleiri atkvøður eru fyri enn ímóti. Stendur á jøvnum, er uppskotið fallið.

Verður atkvøtt um td. eina grein fyri seg krevst somuleiðis fyri at samtykkja greinina, at fleiri atkvøður eru fyri enn ímóti. Stendur á jøvnum, er greinin fallin.

Munurin er, at um tingið ynskir at strika eina grein (ella td. eina ávísa játtan á fíggjarløgtingslóg), er tað lættari at fella greinina, um atkvøtt verður um hana fyri seg, enn um eitt broytingaruppskot verður sett fram um at strika greinina.

Formansskapurin hevur umrøtt henda spurning, og løgtingsformaðurin hevur síðani ásett hesar reglur:

  1. Tá atkvøtt verður við 2. viðgerð um fíggjarløgtingslóg ella løgtingslóg um eykajáttan, kunna broytingaruppskot verða sett fram smb. § 41, stk. 3. Broytingaruppskotið skal tá setast fam, áðrenn umrøðan byrjar. Tó kann nevnd, meiriluti ella minniluti í henni seta fram broytingaruppskot undir viðgerðini, men áðrenn orðaskiftið endar.Somuleiðis er møguligt hjá tingmanni at biðja um, at atkvøtt verður um serstaka grein ella høvuðskonto fyri seg. Í hesum førum skal tingmaður lata formanninum skrivliga áheitan, áðrenn umrøðan við 2. viðgerð byrjar, um, hvørjar greinar ella høvuðskonti hann vil hava atkvøtt um fyri seg.Við 3. viðgerð verður bert atkvøtt um møgulig broytingaruppskot og um uppskotið soleiðis, sum tað varð samtykt við 2. viðgerð.
  2. Tá atkvøtt verður við 2. viðgerð um onnur uppskot til løgtingslóg, verður bert atkvøtt um broytingaruppskot og upprunauppskotið, tvs. at atkvøðast kann ikki um serstakar greinar ella stk.

*

Tað tykist ikki tingmonnum heilt greitt, nær biðjast kann um orðið, tá skrivligir fyrispurningar eru fyri. Tí henda frágreiðing:

  1. Spyrjarin fær fyrst 10 minuttir at seta spurningin fram og grundgeva fyri honum. Tingmenn kunna ikki gera viðmerkingar.
  2. Svararin fær 15 minuttir at svara í. Tingmenn kunna ikki gera viðmerkingar.
  3. Spyrjarin fær 5 minuttir. Tingmenn kunna ikki gera viðmerkingar.
  4. Svararin fær 5 minuttir. Tingmenn kunna ikki gera viðmerkingar.
  5. Aðrir tingmenn, løgmaður og landsstýrismenn fáa 10 minuttir, tó ikki spyrjari og svarari. Formaðurin spyr um framsøgumenn, sum tó ikki fáa longri talutíð enn aðrir tingmenn. Tingmenn og onnur kunna gera viðmerkingar, eisini spyrjari og svarari. Síðani fáa hesir somu 5 minuttir, og viðmerkingar kunna framvegis gerast.
  6. Spyrjarin fær 5 minuttir. Viðmerkingar kunna gerast.
  7. Svararin fær 5 minuttir. Viðmerkingar kunna gerast.
  8. Tingmaður, sum setir fram fyrispurning, kann ikki vera framsøgumaður fyri sín egna flokk.

26. oktober 1999

Løgtingsformaðurin