Fólkaatkvøða - stjórnarskipan
Viðvíkjandi løgtingsmáli nr. 9/1999
Skjal C
Skriv frá Útvarpi Føroya 28. oktober 1999
28.10.99
Att. Kristina Samuelsen, Løgtingsskrivstovan.
Vit hava fingið fyrispurning frá tygum um, hvussu síðsta veljarakanningin hjá ÚF
er gjørd. Vit skilja, at hetta m.a. er við atliti til fakliga grundarlagið undir
kanningini. Viðvíkjandi hesum kunnu vit upplýsa:
- Endamálið við kanningini var at fáa eina mynd av, hvat veljarin heldur um teir
høvuðsspurningar, sum nú eru frammi í orðaskiftinum um framtíðarstøðu Føroya.
Endamálið var somuleiðis at gera kanningina beint eftir aðalorðaskiftið um
Hvítubók og fullveldisætlanir landsstýrisins. Samsvarandi hesum eru spurningarnir
lutvíst settir við atliti til gongdina í málinum.
- ÚF hevur sjálvt staðið fyri hesi kanningini. Tað hevur ÚF gjørt mangan fyrr,
hóast fjølmiðlarnir hava samskipað sínar veljarakanningar í samtakinum Fynd tey
seinnu árini. Tað var ikki gjørligt hjá Fynd at gera kanningina, tí avgjørdi ÚF
sjálvt at standa fyri hesi kanningini. Hon er gjørd í samstarvi við tey fakfólk, sum
vanliga luttaka í arbeiðinum við veljarakanningum. Kanningin er gjørd sum
telefonkanning, og gjørd eftir somu útveljingarskipan, sum er brúkt í øðrum
líknandi telefonkanningum eisini teimum hjá Fynd.
- 972 fólk hava svarað spurningunum. T.v.s., at talið av persónum í stakroyndini er
umleið tað sama, sum verður brúkt í meiningarkanningum í stórum londum, og er
statistiska óvissan samsvarandi hesum lítil. Statistiska óvissan minkar við vaksandi
tali av persónum í stakroyndini, og er óvissan í hesi kanningini minni enn í
kanningum, sum t.d. hava bygt á 6-700 persónar.
- Kanningin av undirtøkini hjá flokkunum er gjørd á sama hátt sum í øllum øðrum
kanningum, har eisini verður spurt, hvat fólk valdu á síðsta vali, fyri at
eftirkanna, hvussu væl stakroyndin samsvarar við veljarasamansetingina. Talviðgerðin
av hesum partinum av kanningini er gjørd av somu fakfólkum, sum vanliga taka sær av
talviðgerðini av veljarakanningum.
- Vísandi til viðmerkingarnar hjá John Mortensen, samfelagsfrøðingi, í Sosialinum
27. oktober, skal verða gjørt vart við, at endamálið við hesi kanningini ikki var at
eftirkanna, hvussu støðan er broytt sammett við undanfarnar kanningar. Ávís tilgongd
hevur verið í málinum og orðaskiftinum seinastu mánaðirnar, og endamálið við
kanningini hjá ÚF var at fáa eina ábending av, hvørja støðu veljararnir í løtuni
hava til nakrar av spurningunum, sum standa fremst í orðaskiftinum. Uttan at útgreina
tað nærri her, meta vit ikki, at nakað grundarlag er undir viðmerkingunum hjá nevnda
samfelagsfrøðingi.
Vinarliga
Útvarp Føroya
Jógvan Jespersen