Nevndarskjøl trivnaðarnevndin 1999

Viðvíkjandi løgtingsmáli nr.  29/1999

29 Uppskot til  løgtingslóg um dagstovnar og dagrøkt

Skjal O

Latið nevndini 04.03.2000

Tórshavn 3.mars 2000

Trivnaðarnevndin.

Hervið senda vit tykkum í trivnaðarnevndini, teir spurningar felagið ynskir at framføra á ásetta fundinum við tykkum týsdagin 7.mars – kl. 9.45

Felagið hevur sent nógvar aðrar viðmerkingar til sjálvt lógaruppskotið, men tá bert ein tími er avsettur til okkara, hava vit valt at nema við tey týdningarmestu málini - raðfest soleiðis:

4. At settur verður pedagogiskur ráðgevi.

Ad.1 Samráðingarrætturin

Felagið leggur stóran dent á, at hetta verður staðfest í sjálvari lógini.

Spurningurin um samráðingarrættin var frammi til 1. viðgerð, har fyrispurningur varð settur Helenu Dam á Neystabø um samráðingarrættin – har hon svaraði, at ætlanin var, at Fíggjarmálastýrið framvegis skal hava samráðingarrættin.

Ad.2 Minimums normeringslykil í sjálva lógina.

Er endamálið at gera eina góða barnagarðslóg, so eigur útbúgvið starvsfólk at verða sett. Sum minsta mark má núgaldandi normeringslykil staðfestast í sjálvari lógini / Gr.8

Viðm.: Vit vilja vísa á, at Tórshavnar Býráð, sum hevur teir flestu barnagarðarnar - í sínum viðmerkingum til lógina eisini er av somu áskoðan. –  T.Býráð viðmerkir, at einki er nevnt í lógini hvørki um normering av starvsfólki í mun til barnatali - ei heldur nakað um samráðingarrættin við Føroya Pedagogfelag.

Ad.3 Námsfrøðiligu stevnumiðini.

Tað rættasta er, at sjálv lógin ásetir tey námsfrøðiligu stevnumiðini og virksemi, fyri at tryggja at stevnumiðið ikki verður broytt við evt. reglugerð/kunning alt eftir hvør landsstýrismaður umsitir málsøki.

Okkara uppskot til orðing av § 3,stk.3 er soljóðandi:

• at skapa støði fyri, at børnini gerast sjálvstøðug og hugsandi menniskju, sum virkin og ábyrgdarfull taka lut í einum demokratiskum samfelag undir skjótari og áhaldandi menning.
• at menna tey skapandi evnini hjá børnunum við atliti til at styrkja teirra samleika, sjálvsvirði, sjálvskenslu og evni til at taka sær av egnum viðurskiftum.
• at tryggja børnum eitt heilsugott uppvakstrarumhvørvi við hølum og uttanumøkið, sum er egna til endamálið við atlitið til barnanna aldur og tíðina tey eru í barnagarðinum/ frítíðarskúlanum.
• Børnini skulu tryggjast fjølbroyttar virkismøguleikar í tryggum umhvørvi.
• í samstarv við heimið at styrkja eina fjøltáttaða menning við atlitið til náttúruna og mentanina.
• at hava í huganum tørvin hjá tí einstaka barninum uttan mun til teirra førleika.
• At stimbra teirra sálarligu og likamligu menning, soleiðis at tey fáa mest gagn av barnaárum sínum.
• at styrkja átrúnaðarligu siðvenju barnanna.

Viðm.: Um hetta ikki verður samtykt at seta í lógina og arbeiðsbólkur ístaðin verður settur at orða námsfrøðiligu stevnumiðini og virksemi - vil felagið vísa á, at alneyðugt er at umboðini í slíkum arbeiðsbólki verða fakfólk við fakligum førleika.

Ad.4 At settur verður pedagogiskur ráðgevi.

Í viðmerkingunum undir fíggjarligar avleiðingar stendur: Mett verður tó, at landið setir pening av til eftirlit og ráðgevandi uppgávur, sum álagdar eru Almanna- og Heilsumálastýrinum samb. hesum uppskoti.

Okkara uppskot er, at tað eigur ikki at metast um tørvin á ráðgeving – her eigur at staðfestast í lógini, at pedagogiskur ráðgevi verður settur.

Stutt viðmerking: Felagið hevur gjørt vart við at dagrøktin ikki eigur at verða umfatað av hesi lóg, grundað á, at barnagarðar og dagrøktir ikki eru samanbærilig. Allar tær viðmerkingar felagið hevur framført eru um barnagarðar o.l.

Ein rætting: Tað stendur at viðmerkingar til lógina eru frá Føroya Lærarafelag.

Tað er ikki rætt, tær eru frá Føroya Læraraskúla.

 Føroya Pedagogfelag