Skjal J
Tórshavn 25/02-2000
Helena Dam á Neystabø, landsstýriskvinna
Almanna- og Heilsumálastýrið
Eirargarður 2
100 Tórshavn
Viðv. uppskotinum til nýggja barnagarðslóg.
Í framhaldi av samskifti okkara, har vit fleiri ferðir hava víst á ónøgd okkara um, at vit ikki hava verið við til at tilevna lógaruppskotið, hóast Føroya Pedagogfelag longu í 1994 hevur undirskrivað avtalu við Føroya Landsstýri – sí hjáløgdu avtalu - um at Føroya Pedagogfelag fær umboð í møguligar nevndir/arbeiðsbólkar, sum verða settar at gera broytingar viðvíkjandi bygnaði v.m. innan øki pedagogfelagsins.
Sama ár varð somuleiðis avtala gjørd partanna millum - sí hjáløgdu avtalu - at í samband við broytingar av normeringum, skal Føroya Landsstýri samráðast við Føroya Pedagogfelag, um nær og hvussu størvini skulu setast.
Sum tær kunnugt, hevur Føroya Pedagogfelag hvørki fingið umboð í nevndina/ arbeiðsbólkin, sum hevur arbeitt við uppskotinum til nýggja barnagarðslóg - ei heldur hava nakrar samráðingar verið um broyttar normeringar ella starvsviðurskifti annars, hóast avleiðingin av ætlaða nýggju lógini fer at verða munandi broytingar í normeringum og starvsviðurskiftum annars hjá limum okkara.
Vit skulu tí við hesum boðað frá, at her er talan um brot á galdandi seravtalu, og vit skulu somuleiðis gera vart við, at um núgaldandi normeringsásetingar ikki - sum minsta mark - verða ásettar í lógini, fer felagið víðari við málinum.
Vit vóna at Almanna- og Heilsumálastýrið er sinnað at halda gjørdar avtalur, og vænta tí at frætta aftur.
Avrit av hesum skrivi er sent Trivnaðarnevnd løgtingsins.
Vinarliga
n.v.
Carita Björklund, form.
Skjal:
Úrrit úr sáttmála dagfestur 1. februar 1994 millum Føroya Pedagogfelag og Føroya Landsstýri.
........
2. Partarnir eru samdir um, at Føroya Pedagogfelag fær umboð í møguligar nevndir/arbeiðsbólar, sum verða settar at gera broytingar viðvíkjandi bygnaði v.m. innan øki pedagogfelagsins.
3. Partarnir eru samdir um í felag at umrøða høvuðsreglur um starvsfólkapolitikk, útbúgvingarpolitikk og leiðsluhættir v.m. innan øki pedagogfelagsins. Arbeiði skal byrja í seinasta lagi 1. apr. 1994.
4. Í samband við broytingar av normeringum, skal Føroya Landsstýri samráðast við Føroya Pedagogfelag, um nær og hvussu størvini skulu setast.
.......