Løgtingsfíggjarlóg 2000

Løgtingsins Fíggjarnevnd
Att: Marius Rein, Skrivari
Gamla Apotek
100 Tórshavn

Mikudagin 17. November 1999, vitjaði Løgtingsins Fíggjarnevnd á Klaksvíkar Sjúkrahúsi. Á fundinum heitti Bjarni Djurholm, formaður, á okkum, um at senda tilfar, ið varð umrøtt á fundinum.

Jona Nielsen, fyristøðukvinna og undirritaði, løgdu tilfar fram á fundinum.

Vikarierandi kir. yvirlækni, Henrik Grønborg, greiddi frá arbeiðnum á Klaksvíkar Sjúkrahúsi og gjørdi onkrar samanberingar við Ríkissjúkrahúsið, har hann starvast til dagligt.

Jona Nielsen vísti við lyklaorðum á gongdina á sjúkrahúsinum upp gjøgnum 60’ini, 70’ini, 80’ini og 90’ini og hvat sermerkti hesi tíðarskeið. Endamálið við hesum, var at útgreina søguligu samansetingina av virkseminum, at vísa á, at virksemið er økt og at virksemið, sum heild, er vorðið meira fjøltáttað sum árini eru liðin. Í hjálagda tilfari frá fyristøðukvinnuni, er eisini yvirlit yvir ymisk ynskir um útskiftingar og íløgur á deildunum. (samanheft tilfar – Klaksvíkar Sjúkrahús – Søguligt yvirlit).

Undirritaði vísti hagtøl fyri tilvildarlig ár frá somu tíðarskeiðum. Hesi vísa, at talið av innleggingum økist og at miðal liggitíðin lækkar. (skjal 1)

Roknskaparhagtøl fyri øll trý sjúkrahúsini fyri árini 1989 og 1997 vórðu víst. Hesi vísa, at KS í 1997 fekk líknandi játtan sum eftir niðurskurðin í 1990. Hini bæði sjúkrahúsini eru í 1997 við at koma aftur á somu játtan sum tey høvdu í 1989, árið fyri tann stóra niðurskurðin! (skjal 1)

Eisini vórðu víst hagtøl, ið vísa, at virksemið ikki er lækkað eftir niðurskurðin í 1990. Hetta merkir stutt sagt, at effektiviteturin er øktur! (skjal 2)

Fyri at vísa hvussu peningur til "sjúklinga-relateraðar" útreiðslur er varðveittur, vóru hagtøl framløgd fyri 1989 og 1998. Hesi vísa, at tað serliga er spart í lønarbólkinum og í umsiting av húsum v.m. Soleiðis hevur borið til at hildi virkseminum ígongd og enntá byrja nýggjar viðgerðir. (skjal 3)

Viðv. medico tekniskum tólum, fekk fíggjarnevndin at vita, at Torbein Rein, teknikari á Landssjúkrahúsinum, førir yvirlit fyri øll trý sjúkrahúsini. Yvirlitið vísur slag av tóli, merki, innkeypsár og nær ráðiligt er at skifta út!

Burtursæð frá hesum tólum, er tørvurin stórur. Í hjálagda hefti (søguligt yvirlit) er listi, ið vísur til neyðugar íløgur á deildunum. Fyri sjúkrahúsið sum heild, meta vit tað vera átroðkandi, at aðrar útskiftingar og nýíløgur verða framdar. Hesar eru:

Sjúkrabilar, edv-tól, edv-kervi, størri viðlíkahald av 3 sethúsum og útskiftan av taki á sjálvum sjúkrahúsinum. Kostnaðurin av hesum er umleið 4 mió. kr.

Vit loyva okkum eisini at viðleggja bóklingin Klaksvíkar Sjúkrahús 1999, ið inniheldur frágreiðingar frá øllum deildum sjúkrahúsins.

Vit takka fyri at fíggjarnevndin gjørdi túrin til Klaksvíkar og vóna at okkurt fer at spyrjast burturúr.

Vinarliga,

Heri Ellingsgaard
Umsjónarmaður