Ár 2000, hósdagin 11. mai, kl. 13.30, varð tingfundur settur.

Marjus Dam, løgtingsmaður, og landsstýrismenninir Helena Dam á Neystabø og Finnbogi Arge vóru ikki á fundi.

Til viðgerðar:

1. 3. viðgerð av tingmáli nr. 82/1999: Uppskot til løgtingslóg um kommunustýri.
   Broytingaruppskot frá Finnboga Ísakson, Heðin Mortensen, Jógvan við Keldu, Bjarna Djurholm, Jógvan á Lakjuni, Lisbeth L. Petersen, Jóanis Nielsen, Heina O. Heinesen, Jenis av Rana, Jákup Sverra Kass, Finni Helmsdal og Hergeir Nielsen til § 4 samtykt 27-3-0. Broytingaruppskot frá Óla Breckmann, Rúnu Sivertsen, Alfred Olsen og Hans Paula Strøm til § 6 samtykt 20-4-6. Uppskotið, sum samtykt við 2. viðgerð og soleiðis broytt við 3. viðgerð, endaliga samtykt 20-3-7.
   Málið avgreitt.
   
2. 3. viðgerð av tingmáli nr. 1-10/1999: Uppskot til eykajáttanarløgtingslóg fyri mai 2000.
   Uppskotið, sum samtykt við 2. viðgerð, endaliga samtykt 30-0-0.
   Málið avgreitt.
   
3. Ríkisumboðsmaðurin svaraði fyrispurningi nr. 100-42/1999 frá Jenis av Rana, løgtingsmanni, viðvíkjandi hjúnalagslógini.
   Málið avgreitt.
   
4. Karsten Hansen, landsstýrismaður, svaraði fyrispurningi nr. 100-44/ 1999 frá Bjarna Djurholm, løgtingsmanni, viðvíkjandi bensin- og dieselavgjøldum. (Endurspurningur)
   Málið avgreitt.
   
5. Høgni Hoydal, landsstýrismaður, svaraði fyrispurningi nr. 100-48/1999 frá Lisbeth L. Petersen, løgtingsmanni, viðvíkjandi landsstýriskunngerðum í sambandi við nýggju kirkjulógirnar.
   Málið avgreitt.
   
6. Høgni Hoydal, landsstýrismaður, svaraði fyrispurningi nr. 100-50/1999 frá Heðin Mortensen, løgtingsmanni, viðvíkjandi føroyskum skiparum á donskum skipum.
   Málið avgreitt.
   
7. Løgmaður svaraði fyrispurningi nr. 100-52/1999 frá Edmund Joensen, løgtingsmanni, viðvíkjandi kunning um eitt møguligt fullveldi.
   Málið avgreitt.

Formaðurin boðaði frá, at nú eru ikki fleiri mál at viðgera, og um einki serligt mál kemur, so verður ikki tingfundur aftur fyrrenn á ólavsøku. Hann segði, at tingið síðani á ólavsøku 1999 hevur havt 90 fundir, ið hava vart 348,35 tímar, í miðal fyri hvønn tingfund 3,71 tímar. 129 mál vórðu framløgd, íroknað 8 frágreiðingar sambært § 51 í tingskipanini. 4 mál eru tikin aftur, og eitt mál er ikki komið aftur úr nevnd. Hini málini eru øll avgreidd frá tinginum. 52 skrivligir fyrispurningar eru settir, harav ein ikki er svaraður. 42 munnligir fyrispurningar vórðu settir og svaraðir, og ófráboðaðir fyrispurningar vóru á skrá á 5 fundum. Tingnevndirnar hava tilsamans havt 209 fundir. Formaðurin takkaði fyri góðan tingsið og gott samstarv tvørtur um floksmørk og ynskti tingmonnum góða summarfrítíð. 

Fundur lokin kl. 19.05 

Finnbogi Ísakson
løgtingsformaður

/Marius Rein
skrivari