Ár 1999, hósdagin 16. september , kl. 13.30, varð fundur settur.

Løgtingsmenninir Eyðun Viderø, Jógvan á Lakjuni, Jákup Suni Joensen, Jenis av Rana, Sámal Petur í Grund og Hergeir Nielsen og landsstýrismenninir Høgni Hoydal, Eyðun Elttør og Helena Dam á Neystabø vóru ikki á fundi.

Farloyvi:

Skriv frá Kristian Magnussen, dagfest 13. september 1999, við umsókn um farloyvi frá 18. september til og við 15. oktober 1999, vegna luttøku á ST-aðalfundi, og at næsti maður á lista Javnaðarfloksins í Suðurstreymoyar valdømi tekur sæti á tingi. Samtykt uttan atkvøðugreiðslu, at Joan Ziskason, ið áður hevur verið á tingi, skal taka sæti fyri Kristian Magnussen.

Skriv frá Dan R. Petersen, dagfest 13. september 1999, við umsókn um farloyvi frá 16. september 1999, og at næsti maður á lista Javnaðarfloksins í Eysturoyar valdømi tekur sæti á tingi. Formaðurin heitti á løgtingsmenninar Bjarna Djurholm, Páll á Reynatúgvu og Flemming Mikkelsen um at kanna valbrøvini fyri Javnaðarflokkin í Eysturoyar valdømi. Bjarni Djurholm mælti til, vegna seg sjálvan, Páll á Reynatúgvu og Flemming Mikkelsen, at Andrias Petersen tekur sæti á tingi fyri Dan R. Petersen. Samtykt uttan atkvøðugreiðslu.

Til viðgerðar:

1. 3. viðgerð av tingmáli nr. 3/1999: Uppskot til løgtingslóg um avtøku av løgtingslóg um avmarking av løn í samband við sjúku.
   Uppskotið, sum samtykt við 2. viðgerð, endaliga samtykt 25-0-0.
   Málið avgreitt.
   
2. Finnbogi Arge, landsstýrismaður, svaraði fyrispurningi nr. 100-5/1999 frá Dan R. Petersen, løgtingsmanni, viðvíkjandi útbyggingarætlanini hjá SEV viðvíkjandi Eiði 3 og 4.
   Málið avgreitt.
   
3. Frágreiðing frá løgmanni, sambært § 51, stk. 3 í tingskipanini.
   Løgmaður boðaði frá, at hann í dag hevur móttikið frágreiðingina "Føroyar í Kalda Krígnum" frá nevndini, ið løgmaður setti í februar 1997, til kanningar av hernaðarmálinum. Frágreiðingin, ið verður almannakungjørd mánadagin 20. september 1999, verður í dag send tingmonnum í trúnaði. Støða verður seinni tikin til, um aðalorðaskifti skal verða um frágreiðingina.
   
4. Framløga.
   Formaðurin boðaði frá, at Karsten Hansen, landsstýrismaður, hevur lagt fram tingmál nr. 1-2/1999: Uppskot til eykajáttanarløgtingslóg fyri september 1999.

Tikið av dagsskrá:

Svar uppá fyrispurning nr. 100-3/1999 til Finnboga Arge, landsstýrismann, frá Henrik Old, løgtingsmanni, um tunnil millum Hov og Øravík og svar uppá fyrispurning nr. 100-4/1999 til Finnboga Arge, landsstýrismann, frá Henrik Old, løgtingsmanni, um sigling hjá Strandferðsluni millum Havnina og Vág.

Formaðurin fráboðaði fyrispurning nr. 100-7/1999 til Vibeke Larsen, ríkisumboðsmann, frá Henrik Old, løgtingsmanni, um tyrluflúgving hjá donsku sjóverjuni við Føroyar.

Formaðurin setti næsta fund at verða mikudagin 22. september 1999, kl. 13.30 við hesi dagsskrá:

1. Munnligir fyrispurningar.
2. Svar uppá fyrispurning nr. 100-3/1999 til Finnboga Arge, landsstýrismann, frá Henrik Old, løgtingsmanni, um tunnil millum Hov og Øravík.
3. Svar uppá fyrispurning nr. 100-4/1999 til Finnboga Arge, landsstýrismann, frá Henrik Old, løgtingsmanni, um sigling hjá Strandferðsluni millum Havnina og Vág.
4. Framløga.

Fundur lokin kl. 14.30

Finnbogi Ísakson
løgtingsformaður

/Marius Rein
skrivari