Løgtingsins gerðabók fyri tingsetuna 2004

51. fundur

Ár 2005, hósdagin 10. mars, kl. 13.40 varð tingfundur settur.

Løgtingsmenninir Finnur Helmsdal, Marjus Dam og Jákup Mikkelsen, og Jógvan við Keldu, landsstýrismaður, vóru ikki á fundi.

Farloyvi:

Skriv frá Sverra Midjord, løgtingsmanni, dagfest tann 4. mars 2005, við umsókn um farloyvi frá og við 10. mars 2005 og 10 dagar fram, og at næsti maður á lista Javnaðarfloksins í Suðuroyar valdømi tekur sæti á tingi.
 

Skriv frá Jørgen Niclasen, løgtingsmanni, dagfest tann 4. mars 2005, við umsókn um farloyvi frá og við 10. mars 2005 til og við 19. mars 2005, og at næsti maður á lista Fólkafloksins í Vága valdømi tekur sæti á tingi.

Skriv frá Óla Breckmann, løgtingsmanni, dagfest tann 9. mars 2005, við umsókn um farloyvi frá 10. mars 2005 og 10 dagar fram, og at næsti á lista Fólkafloksins í Suðurstreymoyar valdømi tekur sæti á tingi. Skriv frá Anniku Olsen, ið áður hevur sitið á tingi, dagfest 9. mars 2005, har sagt verður frá, at hon ikki fær møtt á tingi, og skriv frá Eli Christiansen, dagfest 9. mars 2005, har sagt verður frá, at hann ikki fær møtt á tingi.
 

Skriv frá Vilhelm Johannesen, løgtingsmanni, dagfest tann 9. mars 2005, við umsókn um farloyvi frá 10. mars 2005 og við 12 dagar fram, og at næsti maður á lista Javnaðarfloksins í Norðoya valdømi tekur sæti á tingi.

Formaðurin heitti á tingmenninar Andrias Petersen, Heðin Zachariasen og Kára P. Højgaard um at kanna valbrøvini í Suðuroyar og Suðurstreymoyar valdømum, og á tingmenninar Hergeir Nielsen, Gerhard Lognberg og Kaj Leo Johannesen um at kanna valbrøvini í Vága og Norðoya valdømum.

Fundur niðurlagdur kl. 13.44
Fundur uppafturtikin kl. 13.54

Hergeir Nielsen mælti til, vegna seg sjálvan, Gerhard Lognberg og Kaj Leo Johannesen, at Jóanis Nielsen tekur sæti fyri Jørgen Niclasen, og at Mamy Dahl Sørensen tekur sæti fyri Vilhelm Johannesen. Andrias Petersen mælti til, vegna seg sjálvan, Heðin Zachariasen og Kára P. Højgaard, at Mikkjal Sørensen tekur sæti fyri Sverra Midjord, og at Heðin D. Poulsen tekur sæti fyri Óla Breckmann. 

Samtykt uttan atkvøðugreiðslu.  

Til viðgerðar:

 

1.        Ófráboðaðir fyrispurningar
 

2.        1. viðgerð av tingmáli nr. 45-4/2004: Grannskoðan av almennum roknskapum: Føroya Jarðargrunnur fyri fíggjarárið 2003
Málið beint beinleiðis til 2. viðgerð.
 

3.        1. viðgerð av tingmáli nr. 45-5/2004: Grannskoðan av almennum roknskapum: Grunnurin fyri Vakstrarhús og Grønmetisframleiðslu fyri fíggjarárið 2003
Málið beint beinleiðis til 2. viðgerð.
 

4.        1. viðgerð av tingmáli nr. 46/2004: Uppskot til løgtingslóg um afturlatingartíðir fyri handlar
Málið beint í vinnunevndina.
 

5.        Framløga
Formaðurin boðaði frá, at mentanarnevndin hevur lagt fram álit í  tingmálunum nr. 41/2004: Uppskot til løgtingslóg um broyting í løgtingslóg um studentaskúlar v.m., og nr. 42/2004: Uppskot til løgtingslóg um broyting í løgtingslóg um skeið til hægri fyrireikingarpróvtøku v.m., at vinnunevndin hevur lagt fram álit í tingmálunum nr. 33/2004: Uppskot til  løgtingslóg um at byggja umsitingarbygning á Krambatanga á Trongisvágsfirði og nr. 39/2004: Uppskot til løgtingslóg um broyting í løgtingslóg um at byggja samferðsluhavn á Trongisvágsfirði, og at Jóannes Eidesgaard, løgmaður, vegna landsstýrið, hevur lagt fram tingmálini nr. 71/2004: Uppskot til samtyktar um at sjálvbodna frumskjalið frá 18. desember 2002 til ST-sáttmálan frá 10. desember 1984 móti pínslu og aðrari miskunnarleysari, ómenniskjaligari ella niðrandi viðferð ella revsing verður sett í gildi fyri Føroyar, nr. 72/2004: Uppskot til samtyktar um norðurlendskan sáttmála um almannatrygd frá 18. august 2003, nr. 73/2004: Uppskot til samtyktar um UNESCO sáttmála frá 17. november 1970 um tiltøk at banna og fyribyrgja óloyviligum inn- og útflutningi og ognarskifti av mentanargripum, nr. 74/2004: Uppskot til samtyktar um frumskjal frá 2003 til altjóða sáttmála um at seta á stovn grunn viðvíkjandi endurgjaldi fyri oljudálkingarskaðar frá 1992, og nr. 75/2004: Uppskot til samtyktar um Sáttmála um Evropeiska Orkusáttmálan frá 17. desember 1994.

Hesir tingmenn viðmæla, sambært § 54, stk. 2, í tingskipanini, at málini kunnu leggjast fram og fáa viðgerð: Kaj Leo Johannesen, Lisbeth L. Petersen, Alfred Olsen, Gerhard Lognberg, Kjartan I. Joensen, Poul Michelsen, Henrik Old, Mamy Dahl Sørensen, Mikkjal Sørensen, Heðin D. Poulsen, John Johannessen, Johan Dahl, Olav Enomoto, Heðin Zachariasen, Andrias Petersen, Jóanis Nielsen og Anfinn Kallsberg.

Formaðurin fráboðaði fyrispurning nr. 100-20/2004 til Jógvan á Lakjuni, landsstýrismann, frá Heðin D. Poulsen, løgtingsmanni, viðvíkjandi føroyskari gransking og løgfrøði, og fyrispurning nr. 100-21/2004 til Birgit Kleis, ríkisumboðsmann, frá Heðin D. Poulsen, løgtingsmanni, viðvíkjandi grønlendsku heimildarlógini í uttanríkismálum. 

Formaðurin setti næsta fund at verða fríggjadagin, 11. mars 2005, kl. 10.00 við hesi dagsskrá:

1.         Atkvøðugreiðsla um fyrispurning nr. 100-20/2004 til Jógvan á Lakjuni, landsstýrismann, frá Heðin D. Poulsen, løgtingsmanni, viðvíkjandi føroyskari gransking og løgfrøði

2.         2. viðgerð av tingmáli nr. 19/2004: Uppskot til løgtingslóg um umskipan av landsskatta-, mvg- og tollskuld v.m. hjá fólki (Skuldarumskipanarlógin)

3.         1. viðgerð av tingmáli nr. 40/2004: Uppskot til løgtingslóg um tænastumannaeftirløn til ávísar lærarar
Málið verður beint í fíggjarnevndina.

4.         1. viðgerð av tingmáli nr. 47/2004: Uppskot til løgtingslóg um verju av havumhvørvinum
Málið verður beint í rættarnevndina.

5.         1. viðgerð av tingmáli nr. 49/2004: Uppskot til løgtingslóg um stuðul til umsorgararbeiði
Málið verður beint í trivnaðarnevndina.

6.         1. viðgerð av tingmáli nr. 52/2004: Uppskot til løgtingslóg um broyting í løgtingslóg um uppihald á stovni o.l.
Málið verður beint í trivnaðarnevndina.

7.         Framløga

Fundur lokin kl. 17.57 

Edmund Joensen

løgtingsformaður

/Marius Rein

skrivari