Ár 2000, mikudagin 2. august, kl. 13.30, varð tingfundur settur.

Jákup Sverri Kass, løgtingsmaður, og ríkisumboðsmaðurin vóru ikki á fundi.

Farloyvi:
Skriv frá Jógvan við Keldu, dagfest 1. august 2000, við umsókn um farloyvi frá 2. august 2000 og 10 dagar fram, og at næsti maður á lista Fólkafloksins í Norðoya valdømi tekur sæti á tingi. Samtykt uttan atkvøðugreiðslu, at Jógvan Lützen, ið áður hevur verið á tingi, skal taka sæti fyri Jógvan við Keldu.

Skriv frá Vilhelm Johannesen, dagfest 24. juli 2000, við umsókn um farloyvi, og at næsti maður á lista Javnaðarfloksins í Norðoya valdømi tekur sæti á tingi. Formaðurin heitti á løgtingsmenninar Hergeir Nielsen, Jenis av Rana og Páll á Reynatúgvu um at kanna valbrøvini fyri Javnaðarflokkin í Norðoya valdømi. Hergeir Nielsen mælti til, vegna seg sjálvan, Jenis av Rana og Páll á Reynatúgvu, at Mamy Dahl Sørensen tekur sæti á tingi fyri Vilhelm Johannesen.

Samtykt uttan atkvøðugreiðslu.

Til viðgerðar:

1. Val av tveimum limum og tveimum tiltakslimum til Norðurlandaráðið.

Valdir vórðu:

Fastir limir:
Jógvan við Keldu
Dan R. Petersen

Tiltakslimir:
Jógvan á Lakjuni
Heðin Mortensen

2. 1. viðgerð av tingmáli nr. 2/2000: Uppskot til løgtingslóg um broyting í løgtingslóg um vinnuligan fiskiskap.

Málið beint í vinnunevndina.

Løgtingsformaðurin legði fyri tingið frágreiðing frá Petur Even Djurhuus, advokati, sum kanningarstjóra sambært § 38, stk. 2, í løgtingslóg nr. 103 frá 26. juli 1994 um stýrisskipan Føroya í málinum í samband við, at landsstýrismaðurin í menta- og undirvísingarmálum rindaði Sjónvarpi Føroya 1,6 mió. kr. úr gjaldføri landskassans 23. juli 1999. Samstundis boðaði formaðurin frá, at frágreiðingin frá Páll Nielsen, advokati, sum kanningarstjóra sambært § 38, stk. 1, í løgtingslóg nr. 103 frá 26. juli 1994 um stýrisskipan Føroya í spurninginum, um Anfinn Kallsberg, løgmaður gav Løgtinginum nøktandi upplýsingar, tá hann svaraði fyrispurninginum, sum løgtingslimur setti viðvíkjandi leiguútreiðslunum hjá aðalstýrunum, er send við postinum í juni mánaði 2000.

Formaðurin setti næsta fund at verða hósdagin, 3. august 2000, kl. 10.00, við hesi dagsskrá:

1. Umrøða av løgmansrøðuni
2. Framløga

Fundur lokin kl. 16.45

Finnbogi Ísakson
løgtingsformaður

/Marius Rein
           skrivari